“Fat të jetosh në epokën Messi”

23:56 / 19.12.2012

Të shkruash për një lojtar si Lionel Messi, vërtet është shumë e vështirë, po them kështu sepse dihet fare mirë së është më se e vështirë të gjendet ndonjë epitet i mirë për të, pasi që i ka marrë të gjitha ato epitete. Është e paimagjinueshme se çfarë bën ai njeri në fushën e sportit më të popullarizuar në botë. Të shënosh brenda një viti kalendarik 90 gola është diçka e pabesueshme.

Shkruan: Leutrim Ajeti

Po t’i tregosh dikujt që shumë pak e njeh futbollin se një lojtar brenda një viti ka shënuar 90 gola, atëherë sigurisht se nuk do të besonte. Do t’i dukej si diçka absurde dhe e paarritshme, po si mos t’i duket, por ai që ka parë lojërat e “jashtëtokësorit” edhe nëse nuk është tifoz i Barcelonës, edhe nëse është tifoz i një kundërshtari të madh të Barcelonës do t’i përulet njeriut që po mahnit futbolldashësit.

Në asnjë mënyrë nuk dua të tingëlloj si subjektiv, por vërtet Messi e meriton çdo lëvdatë. Më e mira e gjithë këtyre është edhe një fakt që “pleshti” është një njeri shumë modest, e mbi të gjitha shumë njerëzor. Tri herë është zgjedhur lojtari më i mirë në botë, shumë afër për t’u zgjedhur edhe për të katërtën herë, asnjëherë Messin nuk e kemi parë duke dalë nga vetja në fushën e lojës, thjeshtë i pangopur me sukseset e tij.

Kur them është modest, atëherë sigurisht se na kujtohen rastet kur Messi shënon e asiston pareshtur dhe të gjithë ekspertët e analistët e ngrenë në “qiellin e shtatë”, ai më modestinë më të madhe nëpër konferencat për shtyp deklaron se “Këto që po i bëj janë meritat e bashkëlojtarëve të mi” deklaron se “Topin e Artë e meriton Andres Iniesta”, a ka më mirë se sa të kesh një sportist kaq me vlera në ditët e sotme, ku është shembulli më i mirë për fëmijët anembanë botës.

Në këto vite kur po shijojmë “magjitë” e “magjistarit” Messi, duhet të pajtohemi që vërtet jemi me fat që jetojmë në këtë kohë, duke përjetuar spektaklet që na i dhuron ky njëri që vetëm ai di t’i bëjë. Mbi të gjitha kemi se çfarë t’ju tregojmë pasardhësve tanë, sepse po jetojmë në epokën e mbretit Lionel Messi.

(Autori është i diplomuar në gazetari (bachelor) duke vijuar studimet master)

Komente

Portali Telegrafi ka kënaqësinë t'u ofrojë forum të lirë për komente dhe diskutim. Fyerjet dhe përdorimi i fjalëve banale, do të pasoj me përjashtim të menjëhershëm nga komentimi.
Ju lutem lexoni rregullat këtu.