Kroacia do të ndihmojë Kosovën drejt integrimeve
Kroacia dhe Kosova kanë marrëdhënie shumë të mira dhe këto marrëdhënie do t’i zhvillojnë dhe zgjerojnë në të ardhmen edhe më shumë- ka thënë ambasadori i ri i Kroacisë në Kosovë, Zoran Vodopija, në takimin me presidentin Behgjet Pacolli.Në një ceremoni solemne kur edhe dorëzoi letrat kredenciale, Vodopija tha se Kroacia do të japë përkrahjen e saj të vazhdueshme që Kosova të njihet nga sa më shumë shtete, që ajo të anëtarësohet në sa më shumë institucione ndërkombëtare, si dhe të fitojë rolin e saj të rëndësishëm në rajon. Sipas tij, Kroacia do të japë ndihmesën dhe eksperiencën e saj që të ndihmojë rrugëtimin e Kosovës drejt integrimeve evropiane.
Presidenti Pacolli theksoi gjithashtu marrëdhëniet shumë të mira mes dy shteteve dhe u shpreh falënderues për faktin se Kroacia e ka ndihmuar në vazhdimësi Kosovën, si në periudhën e paraluftës, ashtu edhe në të gjitha fazat e shtetndërtimit të saj.
Prania e Kroacisë në Kosovë, në të gjitha format, theksoi Pacolli, është e një rëndësie të veçantë. Në veçanti, ai theksoi mundësitë shumë të mëdha të bashkëpunimit në fushën e ekonomisë dhe u bëri thirrje bizneseve kroate që të investojnë në Kosovë.
Presidenti u shpreh në të mirë të rritjes së bashkëpunimit të vendeve të rajonit, me qëllim të krijimit të lehtësirave për lëvizjen e lirë të qytetarëve, ideve e mallrave, si një parakusht lëvizjen sa më të shpejtë të vendeve të rajonit drejt integrimeve euroatlantike. /Telegrafi/
