Mungojnë 23 nota verbale të njohjeve

Një burim qeveritar i ka thënë gazetës “Koha Ditore”, se disa sosh nuk i kishte arkivuar Ministria, e disa të tjera kishin humbur.

“Deri tash Ministria e Jashtme nuk kishte një folder të veçantë për t’i arkivuar këto dokumente. Ishin lënë ndaras e disa edhe kanë humbur”, i ka thënë gazetës një zyrtar i lartë në Qeveri. “Tash kur po i kërkohen nga Kuvendi, Ministria është mobilizuar për t’i mbledhur kopjet që gjenden te Pacolli dhe në Presidencë”.

Në Ministrinë e Punëve të Jashtme kanë pranuar se ka pasur probleme me arkivimin e të tilla dokumenteve, përfshirë edhe notat verbale të njohjeve. Mirëpo, kanë mohuar se mungojnë 23 prej tyre. Megjithëkëtë, nuk i kanë krijuar qasje gazetës për t’i parë të tilla dokumente që vërtetojnë njohjen e shtetësisë edhe nga 23 vende, me çka do të mund të vërtetohej e kundërta.

Artan Behrami ka thënë se kur ka marrë detyrën e ministrit të Jashtëm Enver Hoxhaj, këshilltar dhe zëdhënës i të cilit është, nuk janë gjetur në këtë institucion dosje, dokumente e procesverbale të ruajtura, të arkivuara sipas standardeve që kërkohen nga institucionet.

Ish ministri, Skender Hyseni ka thënë të ketë lënë në ministri notat verbale të vendeve që ia kishin komunikuar shtetësinë e Kosovës.

“Diku 90 për qind të rasteve në kohën kur unë kam qenë ministër e kanë deklaruar njohjen nëpërmjet notave verbale, të cilat absolutisht janë të arkivuara”, ka thënë Hyseni.

Shtetet, për të cilat nuk ka nota verbale janë 23: Senegali, Polonia, Islanda, Hungaria, Lihtenshtajni, Burkina Faso, San Marino, Maqedonia, Emiratet e Bashkuara, Mikronezia, Panama, Unioni i Komoreve, Mbretëria e Bahrainit, Mbretëria Hashemite e Jordanit, Republika Domenikane, Zelanda e Re, Republika Malawit, Republika e Xhibutit, Republika e Somalisë, Katari, Principata e Andorrës, Republika e Beninit, Bregu i Fildishtë. /Telegrafi/