Pezull edhe reforma zgjedhore (Video)
Komisioni për Reformën Zgjedhore ishte formuar me rezolutë të Kuvendit, pas marrëveshjes politike Thaçi–Mustafa–Pacolli. Sipas marrëveshjes, zgjedhjet presidenciale duhet të mbahen gjatë vitit 2012, pas reformës kushtetuese, ndërsa ato parlamentare në vjeshtën e vitit 2013, pas reformës zgjedhore. Por, Gjykata Kushtetuese ka thënë se presidentja aktuale, Atifete Jahjaga, ka mandat deri në vitin 2016. Pavarësisht se ky vendim nuk prek drejtpërdrejtë Komisionin për Reformë Zgjedhore që e drejton deputeti i LDK-së, Haki Demolli, vendimi i Kushtetueses megjithatë ndikon në punën e këtij Komisioni.
Demolli thotë se reforma zgjedhore duhet të vazhdojë dhe takimet e radhës do të caktohen në mes të gushtit, kur deputetët të kthehen nga pushimet.
“Mund të them se në një farë forme afekton edhe vetë vendimi i tillë në punën tonë. Por, pavarësisht prej kësaj, jam i mendimit që procesi zgjedhor do të vazhdojë edhe më tutje”, ka thënë ai për “Top Channel”. “Deri në marrjen e një vendimi eventual politik - nga cilido subjekt që mund të jetë i pakënaqur me marrëveshjen (pakon e marrëveshjes në përgjithësi) - do të vazhdojmë me punën tonë”.
Sidoqoftë, mbetet të shihet se si do të veprojnë partitë politike që kanë kërkuar të respektohet marrëveshja politike e arritur në prill të 2011-ës, ndërmjet liderit të PDK-së, Hashim Thaçi, atij të LDK-së, Isa Mustafa, dhe Behgjet Pacollit të AKR-së.
Deri tani, kryeministri dhe njëherësh lideri i PDK-së, Hashim Thaçi, ka përshëndetur vendimin e Gjykatës Kushtetuese që thotë se mandati i presidentes Atifete Jahjaga është 5 vjeçar. Në anën tjetër, LDK dhe AKR kanë kërkuar që marrëveshja të respektohet dhe që zgjedhjet presidenciale të mbahen ashtu siç është paraparë. /Telegrafi/
