EULEX injoron thirrjen e kryetarit ilegal të Mitrovicës

13:08 / 5.02.2013

Misioni evropian në Kosovë nuk do që të komentojë thirrjen që ka bërë kryetari ilegal i Mitrovicës, Kërstimir Pantic, drejtuar misioneve ndërkombëtare të sigurisë për të braktisur menjëherë veriun e Kosovës. Zyrtarja e EULEX-it, Bardha Azari ka konfirmuar për Telegrafin, se në kuadër të Task Forcës së Mitrovicës, bashkërisht me Policinë e Kosovës, po zhvillojnë hetime për sulmin e mbrëmshëm në Lagjen e Boshnjakëve, gjatë të cilit u lënduan dy fëmijë.

Ky sulm nxiti drejtuesin e strukturave ilegale, Pantic që t’i akuzojë shqiptarët dhe t’i bëjë thirrje qytetarëve serbë që të ndërpresin çdo bashkëpunim me EULEX-in dhe KFOR-in, duke i cilësuar si forca okupuese.

Pantic ka deklaruar se në të ardhmen për sigurinë e institucioneve do të kujdeset e ashtuquajtura ‘Mbrojtja Civile”, duke pretenduar se vetëmbrojtja është e garantuar me Konventën e Gjenevës.

Në fakt, duke e shfrytëzuar pretekstin se janë duke u mbrojtur veten, grupe të qytetarëve serbë herë pas here bllokojnë lëvizjen e pjesëtarëve të EULEX-it, Policisë së Kosovës e KFOR-it.

Kryesisht bllokadat janë të drejtuara ndaj autokolonave të EULEX-it, në rastet transportohen doganierët e Kosovës në pikat doganore në veri të Kosovës.

Zyrtarja për Informim në Sektorin Ekzekutiv të EULEX-it, Bardha Azari ka theksuar se misioni evropian e ka bërë të qartë qëndrimin për qasje të pakufizuar në veri të Kosovës.

“EULEX-i është i gatshëm të ndihmojë në nivelin teknik të gjitha marrëveshjet e arritura nga dy palët gjate dialogut Prishtinë-Beograd”, ka thënë Azari. /Telegrafi/
 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.