Vllasi: Turp për Jahjagën që nuk e përmendi Luginën e Preshevës

19:02 / 7.02.2013

Azem Vllasi, këshilltar i Qeverisë së Kosovës për politikë të Jashtme, thotë se takimi i Presidentes së Kosovës, Atifete Jahjaga, me atë të Serbisë Tomislav Nikolic, ishte një gjest më shumë protokolar dhe simbolik, pa përmbajtje esenciale politike.

“Qëllimi ishte që të dyja palët të demonstrojnë vullnet për vazhdimin e dialogut... Secili u deklarua me pozicionet e njohura për opinionin: Nikolici tha se Kosova nuk është shtet; ndërsa Jahjaga tha se Kosova është shtet. Gjëra këto jo të reja. Sido që të jetë, kryetari i Serbisë u takua me Kryetaren e shtetit të Kosovës në vendin e tretë, në qendrën e diplomacisë evropiane dhe kjo vetvetiu e ka domethënien e vet”, tha Vllasi për Presheva Jonë.

Sipas tij, është e pakuptueshme se pse pala kosovare, si palë e dëmtuar në konflikt me Serbinë, në biseda nuk shtron kurrfarë kushtesh.

“Mendoj se takimi në Bruksel ishte rast i mirë që Atifete Jahjaga të kërkonte nga presidenti serb që ai publikisht aty të depononte një deklarim apo premtim publik... që Serbia do ta heq nga Kushtetuta Kosovën dhe se kur do ta njoh formalisht Kosovën si shtet. Pa u shtruar kjo çështje, bisedat me Serbinë duken qesharake, joserioze dhe vetëmashtrim”.

Siç shkruan PJ, “harrimin” e Preshevës në këtë takim Vllasi e ka quajtur të turpshëm “që ka njollosur jo vetëm veten, por edhe diplomacinë kosovare”.

“Mos përmendja e çështjes së politikës diskriminuese, problemet tjera të vëllezërve tanë në Luginën e Preshevës... janë krejtësisht të pakuptueshme. Jo që intervenimi i saj do të ndryshonte pozitën e shqiptarëve në Luginë, por së paku do të shihej dhe dëshmohej se ne nuk e heshtim atë çështje”, thotë Vllasi. “Krejt bisedat bëhen për pozitën e serbëve të Kosovës, veçanërisht për pjesën e veriut... ndërsa pala jonë, në këtë rast Jahjaga, as që e përmend çështjen e Luginës... Ky injorim i Jahajgës ndaj Luginës, që ajo i ka thënë Kosovë Lindore, është i pakuptueshëm - turp për të dhe vendin tonë”. /Telegrafi/
 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.