Kryeziu: Kuvendi nuk mund të anashkalohet!

15:38 / 26.02.2013

Zëvendëskryetari i Komisionit parlamentar për Administratë Publike e Qeverisje Lokale, Eqrem Kryeziu, vlerëson se është bërë gabim që Plani për asociacionin e komunave në veri nuk ka kaluar më parë nëpër filtrat e Kuvendit të Kosovës. Kryeziu ka deklaruar për Telegrafin se Qeveria nuk mund ta ndalojë Komisionin që angazhohet për të monitoruar nga afër mënyrën se si do të zbatohet projekti.

“Sigurisht se ne do të jemi të vendosur për të luajtur rolin tonë si anëtarë të Kuvendit. Është dashur që edhe para se të përpilohet plani edhe para se të pranohet, të merrte vizë nga Kuvendi”, ka thënë Kryeziu, i cili është deputet nga radhët e LDK-së.

Sipas Kryeziut, duket se plani për asociacionin e komunave serbe u ‘imponua’, si të gjitha marrëveshjet e tjera ndërkombëtare. Ai mendon se megjithatë, kur vjen puna për t’u implementuar, duhet që të ndiqet një praktikë e monitorimit nga ana e Legjislativit.

“Do të angazhohemi që ky plan të mbetet patjetër brenda kushteve që i parasheh Plani Ahtisaari dhe Kushtetutës së Kosovës, për të mos prekur sovranitetin e vendit”, ka thënë Kryeziu.

Kuvendi e Kosovës kishte miratuar një Rezolutë që e obligonte Qeverinë e Kosovës për të zhvilluar bisedime me palën serbe në Bruksel, por duke theksuar faktin se nuk bën të cenohet sovraniteti i vendit. /Telegrafi/
 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.