Rokadë në Qeveri: Vlora në vend të Bajramit, Besimi në vend të Bedriut?
Partia Demokratike e Kosovës dhe Aleanca Kosova e Re janë në fazën përfundimtare të marrëveshjes për ndryshime në kabinetin qeveritar. Burime brenda dy partive në pushtet, kanë për Radio Kosovën se çështja e emërimeve pothuajse është vendosur dhe se deri javën e ardhshme do të jetë gati përbërja e re.
Sipas të njëjtave burime, Aleancës Kosova e Re do t’i jepet Ministria e Zhvillimit Ekonomik dhe emri i ministrit është vendosur të jetë shefi aktual i Rrjetit të Transmisionit dhe Tregut të Energjisë (KOST) Fadil Ismaili.
Ndërsa, Besim Beqaj mësohet se do të lëvizë në Ministrin e Integrimit. Megjithatë, ai ka kërkuar të shkojë ministër i Financave pas largimit të Bedri Hamzajt.
Për postin e ministrit të Financave në kombinim është edhe Safete Hadërgjonaj që kryeson Komisionin Parlamentar për Financa, si dhe Behxhet Haliti - shefi aktual i departamentit të Administratës Tatimore.
Ajo që dihet është se Bajram Rexhepi do të lërë postin e ministrit të Punëve të Brendshme. Për ta zëvendësuar në këtë post mësohet se personi më i pëlqyer është Vlora Çitaku, ministrja aktuale e Integrimit.
Lëvizje pozitash do të ketë edhe në nivel zëvendësministrave, për të cilat AKR ka kërkuar katër pozita.
Ajo që është mësuar gjithashtu është se postin e zëvendësministrit të diasporës do ta lë edhe Nuredin Lushtaku dhe kjo pozitë do t’i jepet dikujt nga Partia e Drejtësisë.
Në këtë rifreskim pozitash, në ekzekutivin e vendit, në kombinim për t’u bërë pjesë e strukturës qeverisëse është përmendur gjithashtu edhe emri i Kadri Veselit.
Megjithatë, deri më tani, askush nuk ka pranuar të flas zyrtarisht as në Partinë Demokratike e as në Aleancën Kosova e Re. /Telegrafi/
