"Serbia ka nevojë për një katarsis, si Gjermania pas Hitlerit"
Ish-presidenti kroat, Stipe Mesic, tha për ditoren sarajevase Oslobodenje se humbjen e Kosovës Serbia nuk mund ta kompensojë me një pjesë të territorit të Bosnjës dhe Hercegovinës. Ai ka theksuar se Serbia ka nevojë për një katarsis, të njëjtin që e ka kaluar edhe Gjermania pas Hitlerit. "Tashti ata duhet të përjetojnë katarsisin, sepse ne nuk ua kemi zgjedhur Milosevicin. Serbia e ka zgjedhur atë. Prandaj, tash duhet të pranojnë atë që ka pranuar edhe Gjermania pas Hitlerit. Serbia duhet të përballet me pasojat", tha Mesic.
Ai deklaroi se janë krejtësisht të papranueshme iniciativat sipas së cilave për shkak të humbjes së Kosovës, Serbia duhet të ngushëllohet në llogari të Bosnjës dhe Hercegovinës, me Republika Srpskan.
"Ky është vetëm një iluzion. Bosnja dhe Hercegovina duhet të mbijetojë si shtet. Nuk ka shanse shkatërrimi i saj. Bashkësia ndërkombëtare duhet të ushtrojë presion mbi ata që nuk e pranojnë realitetin, ndërsa Bosnja dhe Hercegovina është realitet”, shtoi Mesic, i cili ftoi Beogradin që të distancohet nga ideja e Serbisë së Madhe, në mënyrë që të qetësohen raportet në rajon.
"Beogradit i mbetet të dërgojë një mesazh në Bosnje dhe Hercegovinë dhe Kosovë, një mesazh se nuk ka Serbi të Madhe, perandorake ", tha ish presidenti kroat. /Telegrafi/
