Dokumenti për veriun e Kosovës: Skicë e vjetër!

Zyrtarët e KE-së kanë theksuar se dokument i cili është publikuar në ditoren Blic nuk është përpiluar nga përfaqësuesja e Lartë e BE-së, Catherine Ashton, e as nga bashkëpunëtorët e saj si një ofertë për normalizimin e raporteve Kosovë-Serbi.

Maja Kociancic, zëdhënëse e baroneshës Ashton, ka thënë për Beta se “Komisioni Evropian nuk i komenton mediat e shkruara”.

Dokumenti është demantuar edhe nga ministri i Jashtëm i Kosovës, Enver Hoxhaj, dhe kryeministri i Serbisë, Ivica Dacic.

Disa burime ndërkombëtare në "Forumin e Brukselit" që përfundoi të dielën (e që bashkoi figura të shquara politike amerikane dhe evropiane, e ku një nga temat ishte Ballkani Perëndimor), kanë thënë se fjala mund të jetë për “konturat” e zgjidhjes së mundshme e cila nga qarqet e BE-së, më shumë në formën e një propozimi për shqyrtim, ka dalë nga gushti i vitit të kaluar.

Zyrtarë tjerë në kuluaret e “Forumit...” kanë thënë për Beta se oferta për “Rajonin Evropian Veriu i Kosovës” është si dokument jo obligues që i është dorëzuar qeverisë së re serbe në shtator të vitit të kaluar.

Këto burime thonë se ndonëse kjo “skicë” jozyrtare nuk është pranuar e as është folur për të në gjashtë raundet e fundit në Bruksel, disa udhëzime aty janë të njohura edhe nga negociatat për Asociacionin e komunave serbe, por të cilat tashmë kanë pësuar ndryshime. /Telegrafi/