Pas vendimit të GJND-së, rinis procesi i njohjeve

Bieber ka potencuar se pasi që Gjykata të japë mendimin e saj, procesi i njohjeve të Kosovës do të rifillojë.

Gjykata Ndërkombëtare e Drejtësisë gjithsesi do të dalë me një mendim, i cili nuk do të jetë shumë i qartë nëse shpallja e pavarësisë së Kosovës ka qenë akt legjitim ose jo, ka thënë Bieber duke komentuar deklaratën e kryetarit të GJND-së, Hisashi Ovada i cili ka theksuar se ekziston mundësia që kjo gjykatë të mos japë fare mendim rreth ligjshmërisë së pavarësisë së Kosovës.

Bieber ka thënë se do të jetë tejet interesante se çfarë qëndrimi do të mbajë Serbia pasi që GJND të shpallë mendimin e saj. “Normalisht që Serbia tani për tani potencon se nuk do ta njohë pavarësinë e Kosovës, sepse do të ishte vetëvrasje politike dhe e papërshtatshme për politiken e jashtme serbe, marrë parasysh që ata në vazhdimësi lobojnë për mosnjohjen e Kosovës. Por çështja kryesore është kur Gjykata të dalë me mendimin e saj. A do të jetë më lehtë apo më vështirë për Serbinë që të ndjek të njëjtën politikë ndaj Kosovës”, ka thënë ai.

Ashtu si zyrtarët vendorë, edhe profesori Bieber mendon se procesi në Gjykatën Ndërkombëtare të Drejtësisë ka ndikuar në procesin e njohjeve, që sipas tij, do të vijnë në numër më të madh pas mendimit të kësaj gjykate.

“Opinioni i GJND-së do të sjellë lehtësira në procesin e njohjeve, dhe mendoj se vendimi i Gjykatës Ndërkombëtare të Drejtësisë do të jetë më shumë në të mirë të Kosovës se sa në të mirë të Serbisë. Mendoj se do të ketë përshpejtim të njohjeve. Nuk pres të vijnë njohje në grumbull në të njëjtën kohë, por besoj se pas mendimit të Gjykatës procesi i njohjeve do të rifillojë”, ka thënë ai.

Bieber ka bërë të ditur se Gjykata Ndërkombëtare e Drejtësisë, nisur nga praktikat e mëhershme, pritet që mendimin e saj për ligjshmërinë e pavarësisë së Kosovës ta japë në muajt e parë të vitit të ardhshëm.

Intervista në tërësi emitohet nesër në kuadër të FM Magazinës. /Telegrafi/