KZAP urdhëron KQZ-në të anulojë votat në 15 vendvotime
Megjithëse rinumërimi i votave ka dalë të jetë në rregull Komisioni Zgjedhor për Ankesa dhe Parashtresa ka urdhëruar Komisionin Qendror të Zgjedhjeve që të bëjë anulimin e votave në 15 vendvotime nga të cilat do të mbesin të pavlefshme rreth 1 mijë e 500 vota.Anulimi, sipas zyrtarëve të KZAP, është bërë pasi janë gjetur nënshkrime të falsifikuara të komisionarëve zgjedhor në këto 15 vendvotime, nga të cilat 8 janë në Gjakovë, 3 në Lipjan, 2 në Shtime, 1 në Malishevë dhe 1 në Shtërpcë.
KZAP ka përmbyllur procesin e shqyrtimit të ankesave dhe vendimi i fundit është dhënë për anulim të votave në 15 vendvotime, por jo edhe përsëritje të votimit.
Ky anulim që përfshin 5 komuna, nga të cilat më së shumti janë në Gjakovë, akoma nuk dihet nëse do të ndikojë në rezultatin përfundimtar të ndonjërës nga këto komuna.
Pasi ka marr urdhrin e KZAP për anulim, kryetarja e KQZ-së, Nesrin Lushta, tha se vendimi është obligues dhe do të respektohet.
Vendimi i KZAP është kundërshtuar ashpër nga anëtari i KQZ –së, nga Aleanca për Ardhmërinë e Kosovës, Blerim Burjani, i cili ka kërkuar të mos respektohet ky vendim, përderisa për këtë çështje të jep vendimin Gjykata Kushtetuese, ku ai ka paralajmëruar se do të bëhet padi.
KQZ gjithashtu ka bërë përjashtimin e 105 komisionarëve zgjedhorë nga raundi i dytë në këto qendra votimi, ku janë gjetur parregullsi. /rtk/telegrafi/
Postuar: 18:52 / 24.11.2009 |
RSS 
