Beogradit t’i lehtësohet pengesa e quajtur Kosovë

Në një intervistë për RDW, Heuer ka theksuar se Bashkimi Evropian nuk pranon në radhët e tij anëtarët që nuk i kanë zgjidhur problemet me fqinjët e tyre andaj, ai ka vlerësuar se Beogradi, Prishtina, por edhe Rusia, sikurse edhe bashkësia ndërkombëtare nëpërmjet OSBE-së, janë faktorë që do të ndikojnë në zgjidhjen e “çështjes së Kosovës” – e cila krahas bashkëpunimit me Tribunalin e Hagës, është pengesë për integrimin e Serbisë.

“Kur bëhet fjalë për Kosovën, unë nuk shoh ende zgjidhje, dhe po ashtu nuk besoj se ajo është kryesisht në duart e Beogradit. Ajo (zgjidhja) është pjesërisht edhe në Kosovë, pjesërisht në Moskë, dhe një pjesë e saj në klimën e përgjithshme të një fillimi të ri të bashkëpunimit ndërkombëtar në kuadër të OSBE-së. Mendoj se duhet të krijohet një klimë që Beogradit do t’ia lehtësonte zgjidhjen e këtij problemi”, ka thënë Heuer.

I pyetur ndërkaq, nëse lënia anash e Kosovës, si shteti i vetëm që ka mbetur jashtë procesit të liberalizimit të vizave - mund të destabilizojë situatën në Ballkan, Heuer ka thënë: “Rreziku ekziston përherë. Konsideroj si gjë të gabuar që në Evropë ende nuk jemi të gatshëm që njerëzve - të cilët më parë si qytetarë të Jugosllavisë kanë mundur më lehtë të udhëtonin në Perëndim – t’iu ofrojmë mundësinë që në vend të ngjarjes të shohin si duket demokracia perëndimore”.

Për këtë shkak, ka shtuar Heuer, jemi të hapur për zhvillimin e mëtejmë të politikës së vizave; megjithatë, disa shtete duhet t’i plotësojnë kushtet e caktuara që ky vendim të mund të sillet me përgjegjësi të plotë. “Kosova është një rast, mirëpo ka edhe raste të tjera jashtë Ballkanit, si psh. Bjellorusia. Është e nevojshme që njerëzit të njihen me funksionimin e sistemeve të demokracive perëndimore. Për këtë gjë, ato duhet të inkurajohen nëpërmjet programeve stimuluese, dhe kjo është dëshira jonë”, ka thënë ai. /Telegrafi/