Syla paraqet padi, Rama mohon akuzat

Syla, i cili është apostrofuar nga Bllaca si urdhërdhënës i tij në një numër rastesh të vrasjeve dhe tentimvrasjeve, që sipas tij janë organizuar nga SHIK-u në periudhën e pasluftës, kërkon nga prokuroria ta njoftojë mbi epilogun e hetimeve zyrtare nga ana e saj.

“Arsyeja e kërkesës sime që të më njoftonin mbi epilogun e hetimeve të juaja zyrtare është që pas përfundimit të hetimeve zyrtare kundër Nazim Bllacës, unë do të ndërmarr veprime të caktuara juridike dhe ligjore në mbrojtje të dinjitet tim, për shkak të shpifjeve dhe gënjeshtrave të cilat me deklarimet e tij më 29.11.2009 i ka plasuar në media-opinionin kosovar, i paraqituri”.

Syla e ka autorizuar avokatin Tomë Gashi që ta përfaqësojë në Prokurorinë Publike të Qarkut në Prishtinë, Prokurorinë Speciale të Republikës së Kosovës në Prishtinë, në të gjitha gjykatat kompetente në Kosovë në çështjen penale kundër Nazim Bllacës.

Ndërkohë, edhe Hysni Rama, njëri nga të apostrofuarit dhe të akuzuarit nga Nazim Bllaca, ka mohuar të ketë qenë pjesë e strukturave të SHIK-ut ose i implikuar në çfarëdo krimi.

Rama, gjatë një konference me gazetarët, ka akuzuar akuzuesin, Nazim Bllacën, të cilin e njeh, meqë “jam tezak me gruan e tij”, porse asnjëherë nuk “kam marrë prej ndokujt 100 mijë euro që ta vras”. Sipas Ramës, Nazim Bllaca kishte ardhur në shtëpinë e tij nga Serbia dhe i kishte treguar se ishte i paguar prej këtij vendi që të vriste Xhavit Halitin, Azem Sylën, Kadri Veselin e Fatmir Xhelilin.

Hysni Rama ka qenë kategorik, se asnjëherë nuk ka qenë pjesë e strukturave të SHIK-ut. /Express/RTK/Telegrafi/