PD kërkon efikasitet nga EULEX-i

Ndërkaq sa i përket ngjarjeve të fundit në vend, Ferid Agani, kryetar i kësaj partie ka thënë se PD kërkon nga misioni EULEX që të tregojë efikasitet dhe efektivitet maksimal në detyrën e tyre themelore fuqizimin e sundimit të rendit dhe të ligjit në Kosovë, dhe në këtë drejtim pret përfundimin sa më të shpejtë të hetimeve përkitazi me rastin Bllaca, dhe publikimin transparent të rezultateve përfundimtare.

Përkitazi me këtë, Partia e Drejtësisë kritikon ashpër ngathtësinë dhe pasigurinë e institucioneve të vendit me rastin e reagimit në këtë situatë dhe kërkon koordinimin e tyre shumë më efikas dhe më efektiv me misionin EULEX.

“Qeveria e Kosovës duhet të ndërmerr masa urgjente në fuqizimin e shtetit ligjor, veçanërisht nëpërmjet ngritjes së kapaciteteve njerëzore dhe profesionale të Prokurorisë së Kosovës përfshirë shkallën e domosdoshme të sigurisë, si dhe kompensimin adekuat material për punën e tyre”, vlerëson kjo parti.

PD konsideron se situata e krijuar duhet të shërbejë si mundësi që një herë e përgjithmonë të hiqet hija e dosjeve nga e tashmja dhe e ardhmja e shtetit të Kosovës, si parakusht për përparim të vendit.

“PD tërheq vëmendjen në domosdoshmërinë e eliminimit të polarizimit ekstrem të qytetarëve në baza partiake dhe rajonale, dhe thekson nevojën për qetësi dhe stabilitet në vend para rrethit të dytë të zgjedhjeve për kryetarë të komunave dhe konstituimit përfundimtarë të asambleve komunale”, ka thënë Agani.

Njëkohësisht, PD ka theksuar se “parregullsitë e skajshme të konstatuara në procesin zgjedhor 2009 pas mbylljes së vendvotimeve”, duhet të jenë të fundit dhe në të ardhmen duhet parandaluar me çdo kusht. /Telegrafi/