Kush do ta mbrojë Nazim Bllacën?
Përfaqësues të EULEX-it dhe ata të strukturave të avokatëve të vendit nuk kanë dashur të komentojnë se kush do të jetë përgjegjës për caktimin e avokatit mbrojtës të Nazim Bllacës. Ndërkohë, Bllaca kishte paralajmëruar mundësinë e angazhimit të një avokati ndërkombëtar.Ajo që dihet është se Nazim Bllaca privatisht ende nuk ka caktuar avokat. Konform ligjit, gjyqtari ia kishte caktuar avokatin në ditën kur atij i ishte caktuar masa e arrestit shtëpiak. Avokati Haxhi Millaku, ndërkohë, kishte deklaruar se nuk do të jetë më pjesë e këtij rasti.
Kryetari i Odës së Avokatëve të Kosovës, Musa Dragusha, tha se caktimi i avokatit mbrojtës duhet të bëhet nga autoriteti, i cili po e trajton rastin. “I vetmi që ka autorizime për ta përcaktuar një avokat, është autoriteti, i cili e zbaton procedurën sipas ligjit”.
EULEX-i bën të ditur se, aktualisht, Prokuroria Speciale në bashkëpunim me Policinë, po i zhvillojnë hetimet për këtë rast. Mirëpo, caktimi i avokatit mbrojtës të Bllacës, sipas zyrtarëve të EULEX-it, nuk hyn në kuadër të mandatit të këtij misioni.
Kryetarja e Asamblesë së Gjykatësve të EULEX-it, Maria Giuliana Civinini, tha: “EULEX-i nuk ka avokatë ndërkombëtarë që ushtrojnë detyrën e avokatit. Ne nuk mund të caktojmë me këshillin mbrojtës, një mbrojtës për këtë. Kjo është tërësisht jashtë mandatit tonë”.
Ndërkohë, Nazim Bllaca kishte paralajmëruar se po i shqyrtonte mundësitë për angazhimin e një avokati ndërkombëtar. Këtë opsion, sipas kryetarit të Odës së Avokatëve të Kosovës, Musa Dragusha, nuk e përjashton ligji në fuqi. “Kur kemi parasysh kërkesat e të pandehurit për një avokat nga shteti tjetër, ai mund ta realizojë këtë kërkesë”, u shpreh Dragusha.
Që nga 1 dhjetori, Nazim Bllacës i është caktuar arresti shtëpiak prej 30 ditësh – masë, të cilën ia kishte caktuar gjykatësi i EULEX-it, Francesco Flori. /Radio Evropa e Lirë/
Postuar: 17:19 / 6.12.2009 |
RSS 
