Policia: Çdo gjë gati për natën festive
Policia e Kosovës ka njoftuar se ka bërë të gjitha përgatitjet me rastin e festës së Vitit të Ri 2010. Çdo Drejtori Regjionale e Policisë (Prishtinë, Mitrovicë, Pejë, Prizren, Ferizaj, Gjilan) me njësitë e tyre, kanë përpiluar planet operative dhe janë përgatitur për t’u përballur me situata të mundshme në këtë periudhë kohore. Qëllimi i përbashkët i këtyre planifikimeve, siç thuhet në një komunikatë të Policisë së Kosovës, është: ruajtja e rendit dhe qetësisë publike në mbarë vendin, kontrolli i masës, turmave të njerëzve gjatë manifestimeve/ceremonive festive, parandalimin dhe luftimin e dukurive negative dhe akteve kriminale, si dhe masa të shtuara te sigurisë rreth objekteve me rëndësi vitale,dhe masa të shtuara në trafikun rrugor.
Policia i këshillon qytetarët e Republikës së Kosovës që të kenë kujdes gjatë përdorimit të mjeteve piroteknike dhe ua rikujton atyre se përdorimi dhe posedimi i paligjshëm i armëve të zjarrit është vepër penale, ndërsa policia është e obliguar dhe e vendosur që të reagojë në rastet kur kemi të bëjmë me thyerjen e ligjit.
Me angazhimet e njësiteve policore dhe institucioneve tjera përgjegjëse, si dhe me një kujdes të veçantë te vet qytetarëve, policia beson që kjo natë festive të kalojë pa ndonjë incident.
Numri i telefonave ku qytetarët mund të njoftojnë policinë për ndonjë rast të mundshëm, janë: 192 nga VALA, 922 nga IPKO si dhe 092 nga fiksi. /Telegrafi/
Postuar: 14:38 / 31.12.2009 |
RSS 
