Reduktimi i trupave të KFOR-it në përputhje me rritjen e sigurisë
Ministri shqiptar i Mbrojtjes, Arben Imami, konfirmon kërkesën e Shqipërisë në Stamboll që të bëhet reduktimi i trupave të KFOR-it në Kosovë, por në përputhje me rritjen e sigurisë në shtetin më të ri në botë."Kosova tani ka stabilitet si nga ana politike, ashtu edhe sa i përket krimit dhe trafiqeve, por ka një problem sigurie në veri e që sponsorizohet nga Beogradi, gjë që shkon thelbësisht kundër të gjitha përpjekjeve të NATO-s dhe të komunitetit ndërkombëtar për stabilitet në Kosovë. Natyrisht që me ndryshimin e kushteve do të ketë edhe një zbritje të trupave të NATO-s atje, por ne kërkuam (në Stamboll) që ajo të jetë proporcionalisht me rritjen e sigurisë, në veçanti në pjesën veriore të Kosovës", ka thënë Imami në një intervistë për radion Deutche Welle.
Imami ishte këto ditë në takimin e ministrave të Mbrojtjes të vendeve anëtare të NATO-s në Stamboll, ku ishte i pranishëm Sekretari i Përgjithshëm i NATO-s, Anders Fogh Rasmussen, si dhe ministrat e Mbrojtjes të vendeve anëtare të Aleancës së Atlantikut të Veriut. Në takim mori pjesë edhe Sekretari Amerikan i Mbrojtjes, Robert Gates. /telegrafi/
Postuar: 17:24 / 7.02.2010 |
RSS 
