Kermabon: Do të bëjmë atë që duhet për të luftuar korrupsionin
Askush nuk duhet të jetë mbi ligjin dhe kjo duhet të jetë shumë e qartë për të gjithë, por duhet të jemi shumë të kujdesshëm me spekulimet dhe thashethemet, sepse drejtësia nuk bëhet me thashetheme, por me fakte dhe dëshmitarë- ka thënë shefi i misionit EULEX, Yves de Kermabon, në një intervistë për agjencinë Kosovapress.Edhe pse nuk e përjashton mundësinë nëse është duke u bërë ndonjë hetim ndaj udhëheqësve shtetërorë, Kermabon nuk pranon të japë informacione, por thekson se sa herë që ka ndonjë dosje, dëshmi për korrupsionin ato do të hetohen nga EULEX-i së bashku me institucionet e Kosovës.
Sa i përket luftës kundër korrupsionit, Kermabon ka thënë se “janë disa rrugë dhe mënyra për ta bërë këtë”, ndërkohë që e para është vetë prania e EULEX-it në Kosovë.
“Kemi shumë njerëz të mirë që vijnë nga më shumë se 20 vende anëtare të BE-së dhe vendeve tjera, si SHBA-të, pasi e dini se edhe ata janë pjesë e misionit, dhe për të punuar bashkë me kolegët e Kosovës, që vërtet të bëhet lufta kundër korrupsionit. Jo vetëm korrupsionin në nivel të ulët, por në të gjitha nivelet e për ta bërë këtë duhet të kemi ekspertë të mirë, qofshin financiarë apo të tjerë për të bërë hetimet e tyre. Kjo përfshin të gjitha nivelet dhe qarqet ku mund të dyshohet për korrupsion”, shprehet shefi i EULEX-it.
Kermabon ka siguruar se sa herë që ka ndonjë dosje, dëshmi për korrupsionin, “do t’i hetojmë ato dhe bashkë me institucionet e Kosovës, bashkë me drejtësinë dhe Policinë e Kosovës do të bëjmë atë që duhet për të luftuar korrupsionin”. /Telegrafi/
Postuar: 13:07 / 21.03.2010 |
RSS 
