BE “godet” me Rezolutë

Janë “shkrepur të shtënat” e para në betejën diplomatike rreth Rezolutës që pritet të aprovohet në Asamblenë e Përgjithshme të OKB-së, në shtator ose në fillim të tetorit.

Goditja e parë ka ardhur nga Serbia, e cila ka befasuar Bashkimin Evropian, me deponimin e draftrezolutës së saj, të enjten, mirëpo lëvizjes serbe i është kundërpërgjigjur të njëjtën ditë Bashkimi Evropian.

Burime të gazetës Express kanë konfirmuar se nga Zyra e Përfaqësueses së Lartë të BE-së, Catherine Ashton, është qarkulluar draftrezoluta për Kosovën te të gjitha misionet diplomatike të shteteve të BE-së në New York. Për këtë aksion të Brukselit është njoftuar edhe Qeveria e SHBA-së.

Bashkimi Evropian propozon që Asambleja e Përgjithshme të aprovojë opinionin e GJND-së që thotë se shpallja e pavarësisë së Kosovës nuk ka qenë në kundërshtim me të drejtën ndërkombëtare.

Burime diplomatike kanë thënë se misioneve të përhershme të shteteve të BE-së në Kombet e Bashkuara u janë dhënë disa ditë kohë që të deklarohen se a pajtohen me përmbajtjen e rezolutës.

Ndërkaq, sa i përket tekstit të rezolutës serbe, që në mënyrë të tërthortë bën thirrje për bisedime për statusin e Kosovës, mediet në Beograd kanë raportuar se diplomacia evropiane ia ka bërë të ditur Serbisë se kjo rezolutë është plotësisht e papranueshme. /express/telegrafi/