Pajtohuni me BE-në për Kosovën!

“Mesazhi im është i qartë, Beogradi duhet të shikojë drejtë së ardhmes dhe në koordinim më Brukselin të angazhohet për zgjidhjen e çështjeve që janë pengesë për integrim në Bashkimin Evropian”, ka thënë Drucas në Beograd, pas takimit me presidentin e Serbisë, Boris Tadic, njofton agjencia serbe e lajmeve Tanjug.

Drucas, vendi i të cilit nuk e ka njohur ende pavarësinë e Kosovës, ka thënë se sa i përket propozim-rezolutës serbe, Greqia me siguri do të ketë të njëjtin qendim sikurse shumica e vendeve të Bashkimit Evropian.

Ndërsa presidenti serb, gjatë takimit me diplomatin grek, ka deklaruar se Serbia është konsultuar me partnerët evropian për tekstin e rezolutës për Kosovën, të cilën e ka proceduar në Asamblenë e Përgjithshme të OKB-së.

Tadic tha se nuk ka pasur mosmarrëveshje me vendet perëndimore, edhe pse gjatë ditës së djeshme, Beogradi ka marrë nota kritike nga Uashingtoni, Londra dhe qendrat tjera për moskonsultim përpara dorëzimit të propozim-rezolutës, me të cilën tani i kërkohet Asamblesë së Përgjithshme të jep konkludim mbi opinionin që dha ditë më parë Gjykata Ndërkombëtare e Drejtësisë.

Diplomati grek Drucas do të arrijë sot edhe në Prishtinë ku do të takohet me presidentin Fatmir Sejdiu dhe kryeministrin Hashim Thaçi.

Pas vendimit të GJND-së, Shtetet e Bashkuara dhe shumica e vendeve të Bashkimit Evropian e kanë përshëndetur vendimin e GJND-së dhe i kanë sugjeruar Serbisë të pajtohet me realitetin dhe të shfrytëzojë rastin për ndërtimin e raporteve të mira fqinjësore me Kosovën.

Ndërsa autoritete kosovare kanë shprehur gatishmëri për bisedime për çështje teknike me autoritetet serbe, por jo edhe për statusin, pasi sipas tyre ai është i zgjidhur përgjithmonë.

Serbia ka gjasa të bie në gjunjë!

Ndërkohë në Beograd vazhdojnë reagimet kundër Qeverisë rreth propozim-rezolutës së dorëzuar në Asamblenë e Përgjithshme.

“Serbia e ka gjuajtur vetën në njërin gju me pyetjen e mangët që i është drejtuar Gjykatës Ndërkombëtare të Drejtësisë, ndërsa tani me këtë propozim-rezolutë po përgatitet ta gjuaj vetën edhe në gjurin tjetër”, tha Aleksandar Fatic, drejtor i qendrës për Siguri në Beograd.

Ai tha se Serbia, pavarësisht mbështetjes nga Rusia dhe Kina, do ta ketë të vështirë t’i sigurojë votat e nevojshme në Asamblenë e Përgjithshme të OKB-së, tani pas dhënies së vendimit të GJND-së.

“Na është paralajmëruar të mos merremi më me këtë punë. Shtetet e Bashkuara dhe vendet kryesore të BE-së kanë paralajmëruar po ashtu një kundër-rezolutë, kështu që ka shumë gjasa që në sesionin vjeshtor të Asamblesë së Përgjithshme të fitojmë atë që nuk kemi dashur, të biem në dy gjunjë”.

Edhe partitë kryesore opozitare serbe e kanë kritikuar Qeverinë serbe për procedimin e propozim-rezolutës pa koordinim me Bashkimin Evropian. Ato kanë kërkuar nga pozita që të mos e fshehin faktin se Kosova mund të jetë pengesa kryesore e Serbisë për anëtarësim në Bashkimin Evropian. /Telegrafi/