Kryekomunarët “diplomatë”
Tre kryetarëve të komunave u është kërkuar që t’i dorëzojnë pasaportat diplomatike, të cilat i kanë fituar gjatë kohës kur kanë qenë deputetë të Kuvendit të Kosovës. Njëri nga ta është i gatshëm që ta dorëzojë, një tjetër dëshiron ta mbajë si suvenir, e i treti nuk ka dëshiruar të flas për të. Rasim Selmanaj, Agim Veliu dhe Bojan Stojanovic para pak ditësh kanë marrë nga një ftesë nga Ministria e Punëve të Jashtme. Zyrtarët e ministrisë ua kanë rikujtuar atyre se disa muaj më herët është dashur që t’i kthenin pasaportat, pasi ato nuk vlejnë për kryetarë të komunave.
Rasim Selmanaj, kryetar i komunës së Deçanit ka thënë se është vonuar në kthim të pasaportës për shkak të ngarkesës me punë si njeri i parë i komunës.
“Nuk kam asnjë arsye që të mos e kthej pasaportën”, shprehet Selmanaj.
Pasaportën diplomatike, më për qejf duket se e ka kryetari i komunës së Podujevës, Agim Veliu.
“Dua ta mbajë më tepër si suvenir”, thekson Veliu.
Për dallim nga dy të parët, kryetari i komunës së Graçanicës Bojan Stojanovic nuk ka treguar gatishmëri për t’u përgjigjur. /koha ditore/telegrafi/
Postuar: 11:00 / 31.07.2010 |
RSS 
