Liga mbarëkombëtare: Ide serioze apo për konsum të brendshëm?
Rexhep Hasani
Dy ministrat e Kulturës, Rinisë dhe Sporteve, ai i Shqipërisë Aldo Bumci dhe ai i Kosovës Memli Krasniqi, u mbetet t’i mbarojnë punët e tyre, përkatësisht që të hartojnë projekte të detajuar, gjetjen e modaliteteve për fillimin e funksionimit të ligës mbarëkombëtare të futbollit.
Ç’është e vërteta, njohësit e sportit në Kosovës, e mbi të gjitha ata të Shqipërisë, kanë shprehur skepticizëm, mëdyshje, frikë, hezitim dhe gjasa shumë të vogla për jetësimin e kësaj ideje shumë dobiprurëse për të ardhmen e futbollit shqiptarë.
Skepticizmi më i madh vjen për faktin se ende nuk jemi të bindur se a është e njëmendtë dhe serioze ideja e kryeministrit të Shqipërisë Sali Berisha, për organizimin e një lige mbarëkombëtare, apo hedhja e kësaj ideje është vetëm marketing politik i tij para zgjedhjeve që do të mbahen sivjet në Shqipëri. Në të kundërtën, nëse këshilltarët, ekspertët e kryeministrit shqiptar Berisha, e kanë analizuar mirë e mirë këtë ide shumë të mirëpritur, mekanizmat tjerë ishte dashur që tashmë t’i rreken punës për hartimin e strategjisë për jetësimin e saj edhe në fushën e blerë. Për këtë gjithsesi nevojitet bashkëveprimi me krerët e ministrisë së Kulturës dhe Sportit të Kosovës, i cili po ashtu duhet kryer pjesën e punës së vet me ndihmën e ekspertëve, drejtuesve të Federatës së Futbollit të Kosovës, por edhe mbështetjen e pa rezervë të kryeministrit të Kosovës. Atëherë rezultatet konkrete nuk do të mungojnë.
Derisa adhuruesit e futbollit janë në pritje të hapave konkret, pasi nuk ka asnjë lajm të ri - përpos idesë fillestare të kryeministrit Sali Berisha - prononcimet e drejtuesve të FSHF-së dhe FFK-së, si dhe opinionet e ndryshme të analistëve, rrisin mëdyshjet mos vallë janë zmbrapsur drejtuesit e futbollit qysh para fillimit të punëve përgatitore, si pasojë e mos bisedimit për realizimin e këtij projekti, si dhe të vetëdijshëm për pengesat dhe barrierat të cilat nuk do të jenë të pakta.
Megjithatë, ajo që duhet thënë është se funksionimi i ligës mbarëkombëtare të futbollit, pa asnjë mëdyshje, do të ishte dobiprurëse dhe imediat. Andaj, me angazhimin e pa rezervë të ekspertëve juridikë, sportivë, krerëve të dy federatave të futbollit, por edhe krerëve politikë, do të rezultonte me efekte konkrete . Prandaj, duhet të hiqen të gjitha hezitimet, por edhe të bëhen hapat konkret për gjetjen e modaliteteve për realizimin e funksionimit të kësaj lige; të hartohen variantet fillestare dhe alternative, si dhe të analizohen të gjitha pasojat eventuale të cilat mund të vijnë nga UEFA dhe , siFIFA dhe kostoja financiare e ekipeve pjesëmarrësve në ligën mbarëkombëtare.
Gjithsesi, jetësimi i kësaj lige do t’i shërbejë rritjes së vazhdueshme të cilësisë së futbollit shqiptarë; do të kishte edhe shumë përfitime të tjera, siç janë: trajnerët e futbollit, edukimi i tyre i vazhdueshëm, ai i gjyqtarëve dhe gjithë të tjerëve që punojnë në organizimin e veprimtarive të futbollit... Ndërsa, mbi të gjitha do të përfitonin futbollistët.
Duke e njohur gjendjen shumë të keqe të futbollit të Kosovës - izolimin e tij të padrejtë për më shumë se 20 vite, mospjesëmarrjes në gara evropiane dhe botërore, shuarjen e mijëra talenteve të këtij sporti, por edhe mungesën e vazhdueshme të sukseseve të skuadrave të futbollit shqiptarë pjesëmarrëse në garat evropiane, pasi ato zakonisht mënjanohen që në garat kualifikuese në fazën e parë - kjo bënë që të mos ketë frikë dhe hezitime për organizimin e ligës mbarëkombëtare të futbollit. Së fundmi , edhe rreziku nga ndëshkimi eventual i ekipeve të futbollit të Shqipërisë dhe vetë FFSH-së për mospjesëmarrje të skuadrave shqiptare në garat evropiane nga ana e UEFA, nuk do të ishte një gjë shumë tragjike, pasi do të ishte një kosto e vogël, për të cilën ia vlen që të sakrifikohet.
Vlerësoj se ky është moment i duhur që ekspertët e futbollit të dy shteteve tona të ndara, të veprojnë pa asnjë hezitim, me çka futbolli shqiptar do të bëhet konkurrues i denjë i ekipeve të futbollit të rajonit dhe më gjerë, e me çka ëndrra e kamotshme e adhuruesve të futbollit shqiptar do të bëhej një realitet.
