Kosova viti zero

21:16 / 15.02.2013

Durimi i popullit tonë me të vërtetë nuk ka të sosur. Njerëzit janë të lodhur dhe të dëshpëruar nga rrënimi ekonomik që i ka pushtuar brenda familjes. Dhe, sot më shumë se asnjëherë tjetër kanë nevojë të dëgjojnë të vërteta të thjeshta dhe të ndershme.

Një popull si ky i yni, me gjendje të mjerueshme ekonomike, mungesë të të drejtave bazike të jetesës dhe mirëqenies, si dhe në izolim të plotë në raport me Evropën dhe botën e civilizuar, do të duhej të shprehte në një mënyrë ose tjetër pakënaqësinë.

Për fat të keq, një individ që nuk është i vetëdijshëm se ka diçka më mirë sesa jeta që e jeton, nuk di të kërkojë diçka më shumë. Është ky fenomen i thjeshtë që i lejon qeveritarët tanë të mbesin në pushtet dhe që populli ynë të mbetet i zhytur në imazhin e një shteti që nuk ekziston. Ku është parë që mos të jepet e drejta e udhëtimit të lirë në Bashkimin Evropian dhe kryeministri i vendit me buzëqeshje të deklarojë se fajin e ka Brukseli?! Ndërsa, bashkësia ndërkombëtare i ka treguar dhe do të vazhdojë të tregojë se nëse vazhdojnë me këtë korrupsion shumë të lartë, me këtë arsim të degraduar, me këtë sistem shëndetësor dhe gjyqësor jofunksional, nuk do të kemi qasje në Evropë.

Për pesë të “Newborn” Kosovës mbahen mend këto virtyte të qeverisjes: korrupsion, arsim të degraduar, presidente prej zarfi, ikje të investitorëve, privatizime të brishta, ulje të standardit të jetesës, politizim të institucioneve të “pavarura”, hapje të universiteteve vetëm për të përfituar militantët e të gjitha partive politike, papunësi ekstreme... Përkundër kohës që ka kaluar që nga ekzistenca e monumentit NewBorn Kosova, akoma është në vitin zero.

Një shtet e justifikon ekzistencën e vet me ekonomi të fortë që mundëson funksionim të rregullt të shoqërisë. Kosova këtë nuk e ka dhe nuk e ka pasur asnjëherë qëkur me pompozitet ka nënshkruar në NewBorn.

Pra, Kosova duhet t'i forcojë gjykatat e veta; duhet të krijojë një ambient të sigurt për bizneset e brendshme dhe të huaja. Ne nuk kemi një ambient të sigurt, përkundrazi kemi një ambient të çarë i cili vazhdimisht prodhon skandale. Ne duhet të bëjmë një ndërrim radikal në shfrytëzimin e parasë publike.

Mungesa e një strategjie, mungesa e programeve ekonomike të qeverive tona, e ka sjellë ekonominë e Kosovës në një rrugë pa rrugë. Prandaj, treguesit e tjerë kanë shenja negative, që tregojnë se ekonomia e Kosovës gjendet në një krizë shumë të thellë, e cila normalisht se shprehet pastaj edhe në standardin jetësor. Dhe, me të drejtë mund të konstatojmë se çështja sociale në Kosovë është shumë e rëndë dhe po vjen duke u rënduar gjithnjë e më shumë.

Lufta kundër krimit të organizuar do të thotë që të krijohen kushte që të sigurohemi që liria e lëvizjes nuk përbën rrezik për sigurinë e brendshme të BE-së. Me politikat aktuale të Qeverisë, Kosova është duke shkuar drejt një krize të thellë ekonomike dhe derisa në Kosovë do të ekzistojë korrupsioni, nuk do të mund të ketë kurrfarë zhvillimi.
 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.