Fabius: Assadi nuk meriton të jetojë
Ministri i Jashtëm i Francës, Laurent Fabius, ka deklaruar se presidenti i Sirisë, Bashar al-Assad, “nuk meriton të jetojë”. “Pasi kam dëgjuar dëshmi të tmerrshme të njerëzve që ishin aty, Bashar al-Assadi nuk meriton të jetë në tokë”, ka thënë Fabius pas vizitës që u ka bërë refugjatëve sirianë në kampet e vendosura në kufirin Siri-Turqi.
Fabius, me Turqinë përfundon turneun rajonal, gjatë të cilit ka vizituar edhe Libanin dhe Jordaninë, ku po ashtu ka numër të madh të të zhvendosurve sirianë.
Sipas shifrave të fundit të publikuara nga Agjencia për Refugjatë e Kombeve të Bashkuara,prej marsit të vitit të kaluar mbi 18 mijë persona janë vrarë, ndërsa numri i refugjatëve sirianë në vendet fqinje ka arritur në 170,000: ku 61,000 në Turqi; 47,000 në Jordani dhe Liban, si dhe 15,000 në Irak. /Telegrafi/
