Berisha: Jemi ndër të paktat ekonomi që nuk ramë në krizë

“Vendi ka nevojë për punonjës dhe në kohë reale kompanitë mund të gjejnë kandidatin për vendin vakant të punës. Kjo krizë që ka pllakosur Europën Lindore dhe vendet e zhvilluara ka në themel të saj tregun e punës, me fleksibilitetin apo infleksibilitetin e tij, me shkallën e planifikimit apo të mos planifikimit. Duhet të përqendrohemi në potencialet më të mëdha për krijimin e një tregu pune të aftë dhe në këtë kontekst pa diskutim me rëndësi është portali që ne inaugurojmë sot. Me anë të dixhitalizimit ne realizojmë transparencën më të madhe dhe mundësitë më të mëdha në kohën më të shpejtë”, tha Berisha.

Kryeministri shtoi më tej se çdo masë që merret për punësimin është një masë e sigurt antikrizë, ndërsa nuk ka pa sulmuar edhe opozitën në lidhje me shifrat e saj për papunësinë. “Ne jemi ndër të paktat ekonomi që nuk ramë në krizë, e nuk ramë në recension. Ne kemi një papunësi dhe niveli i saj është larg shifrave absurde që thuhen, kur bëhet fjalë për 1 milion të papunë, në një vend që e ka forcën e punës pak më tepër se kaq, kjo është absurde. Por kjo nuk bën më pak të ndjeshëm problemin e çdo të papuni”, tha kryeministri, raporton Shekulli.

Gjithashtu kryeministri Berisha premtoi se Qeveria do të bëjë gjithçka që qytetari shqiptar të ketë shërbimet dixhitale më të lira ndërsa ka shtuar se vendi i ka mundësitë për të fituar kohën e humbur. /Telegrafi/