BE, gjashtë miliardë euro për punësimin e të rinjve
Samiti i pranverës për udhëheqësit evropianë në Bruksel fokuson krizën ekonomike kësaj here në aspektin e trazirave sociale, masave shtrënguese dhe refuzimit të buxhetit 2014- 2020 nga Parlamenti Evropian. Udhëheqësit e BE-së ranë dakord për një interpretim më fleksibil përsa i përket disiplinës buxhetore të Bashkimit Evropian për të mundësuar kapërcimin e një papunësie rekord dhe recesionit të shkaktuar nga kriza e borxheve duke lejuar më shumë liri veprimi për investime publike.Në ditën e parë të punës, në fokus ishte papunësia e një marrëveshje e vështirë për të shmangur krijimin e të ashtuquajturit "Brez i humbur i të rinjve".
Në një konferencë për shtyp në përfundim të takimit, Presidenti i Këshillit Herman Van Rompuy konfirmoi se kishte marrëveshje midis liderëve për një strategji ekonomike që do të balanconte rivendosjen e stabilitetit financiar e investimet publike për të krijuar rritje ekonomike dhe vendet të reja pune.
"Kemi akorduar 6 miliardë euro, të destinuara për të luftuar papunësinë e të rinjve. Kjo nismë është një nga arsyet pse unë shpresoj se një marrëveshje mes Këshillit dhe Parlamentit për planin financiar do të arrihet së shpejti", tha Van Rompuy.
Ndarja veri- jug në Evropë behet gjithnjë e më domethënëse komentojnë analistët ku jugu i Evropës shton thirrjet për më pak presion për të arritur objektivat e deficitit, por Veriu, i udhëhequr nga Gjermania, mbetet i ankoruar në strategjinë për reforma strukturore.
Konkluzionet e Këshillit mbeten një rrugë e mesme. Disiplinë fiskale dhe qasje e hapur ndaj rritjes, është koncept i ri i adoptuar nga liderët evropianë për të zbutur masat e kursimit. Por në praktikë, qeveritë po reduktojnë shpenzimet e nuk po ndërmarrin hapa në rritjen e taksave, çka nënkupton se do të duhet edhe më shumë kohë për të balancuar deficitin. Kështu vihet në dyshim nëse do të jetë kjo receta e suksesit për të krijuar më shumë vende pune e për t'u orientuar drejt rritjes ekonomike. /Telegrafi/
