Fabregas: Të mësojmë nga disfata
Cesc Fabregas thotë se Barcelona duhet të mësojë nga disfata 3-1 në Kupën e Mbretit ndaj rivalit të hidhur, Real Madridit.Katalanasit ishin favoritë për të kaluar në finale të Kupës pas barazimit 1-1 në ndeshjen e parë në Santiago Bernabeu, por ishin larg formës së tyre më të mirë në ndeshjen e kthimit në Camp Nou duke u eliminuar në mënyrë të turpshme nga gara.
“Duhet të mësojmë nga kjo disfatë, duhet të japim më shumë. Tash duhet ta mbledhim veten, të ecim përpara dhe të fitojmë të shtunën. Dy titujt më të rëndësishëm janë në radhë dhe ne duhet të ecim përpara”.
“Disfata kundër Madridit nuk ka të bëjë asgjë me atë kundër Milanit. Ata janë dy gara të ndryshme. Unë besoj te kjo skuadër. Ne kemi rënë ca, por duke filluar nga nesër duhet të fillojmë të punojmë fuqishëm pasi ne përfaqësojmë një institucion të rëndësishëm”, ka thënë Fabregas.
Barcelona do ta ketë rastin të kërkojë një hakmarrje të menjëhershme ndaj Real Madridit, kur të shtunën udhëton në Bernabeu për një El Classico tjetër, kësaj here në kuadër të La Ligas./Telegrafi/
