Seagal trajnon rojet e shkollave në Arizona

22:30 / 11.02.2013

Ylli i aksionit, Steven Seagal, ka filluar t’i trajnojë disa vullnetarë në Arizona të SHBA-ve, si pjesë e një plani që ka për qëllim që të shfrytëzojë rojet e armatosura për të mbrojtur nxënësit nëpër shkolla në rast të incidenteve.

Aktorin e ka angazhuar njëri nga sherifët e shtetit të Arizonës, ndërsa puna e tij është që t’i stërvitë rojet se si të patrullojnë dhe t’i mbrojnë shkollat. Ideja ka ardhur pas masakrës në Newtown në dhjetor të vitit të kaluar kur u vranë 27 njerëz.

Gjatë trajnimit në shkollën Fountain Hills në një paralagje të Phoenixit, Seagal do të stërvitë 48 vullnetarë, të cilëve do t’u mësojë teknika të llojllojshme dhe strategji, të cilat do t’u ndihmojnë në punën e ardhshme.

“Kam ardhur që atyre djemve t’ua mësoj artet luftarake dhe si të përdorin armët e zjarrit. Dua t’i mësoj që në mënyrë të shpejtë dhe efikase të reagojnë ndaj çfarëdolloj situate kërcënuese, në mënyrë që të mbrojnë fëmijët tanë”, ka deklaruar 60-vjeçari. /Telegrafi/

Komente

Portali Telegrafi ka kënaqësinë t'u ofrojë forum të lirë për komente dhe diskutim. Fyerjet dhe përdorimi i fjalëve banale, do të pasoj me përjashtim të menjëhershëm nga komentimi.
Ju lutem lexoni rregullat këtu.