Vjedh në SHBA, përjashtohet nga Akademia e Shkencave

11:52 / 5.01.2013

Akademia e Shkencave të Shqipërisë ka ngrirë qenien si akademik të Kosta Barjabës, pas vjedhjes që ky i fundit ka bërë në një qendër tregtare në Shtetet e Bashkuara të Amerikës. Në një deklaratë për mediat, Akademia e Shkencave është shprehur se duke u mbështetur në raportin e policisë së Palo Altos, akti i Barjabës është i papranueshëm dhe i turpshëm dhe në kundërshtim me moralin akademik dhe ka vendosur që Kosta Barjaba s'mund të jetë më Akademik i Asociuar.

“Kryesia e Akademisë së Shkencave e Shqipërisë mbështetur në informacionin e marrë nga mediat dhe Raporti i Departamentit të Policisë së Paolo Altos, SHBA, duke e konsideruar të papranueshëm, të turpshëm dhe në kundërshtim me moralin akademik, aktin e kryer nga z. Kosta Barjaba, në mbledhjen e saj të datës 5 janar 2013, vendosi të ngrijë qenien e tij si Akademik i Asociuar i ASHSH”, thuhet në njoftimin e Akademisë së Shkencave, transmeton “Shekulli”.

Tre shqiptarë janë ndaluar në Shtetet e Bashkuara të Amerikës për vjedhje të disa rrobave dhe një çantë në qendrën tregtare “Stanford Shopping Center”, në Palo Alto të Kalifornisë. Këtë lajm e raportojnë ueb-faqet amerikane, “Palo Alto Online News” dhe “Bay City News”. Policia amerikane bën të ditur edhe emrat e shqiptarëve, Kosta dhe Fatbardha Barjaba, 52 vjeç, dhe Joniada Barjaba, 23 vjeç, të cilët janë dërguar në institucionin e paraburgimit në San Mateo County's Maguire Correctional Facility.

Mediat amerikane raportojnë se Barjaba është qytetar dhe rezident në Shqipëri dhe pas ndalimit, bashkë me dy të afërmit e tij, do të përballet me akuzën e vjedhjes së kryer në bashkëpunim. Sipas po të njëjtave burime meditike amerikane, Kosta Barjaba, së bashku me të shoqen dhe të bijën, janë liruar nga paraburgimi me kusht që të përballen me akuzën, pasi paguan garancinë.

Pas akuzës se akademiku shqiptar Kosta Barjaba është kapur në një qendër tregtare duke vjedhur, gazeta "Shekulli" ka kontaktuar Kosta Barjabën, për të marrë një prononcim prej tij në lidhje me ngjarjen. Barjaba e ka përgënjeshtruar këtë ngjarje. Ai u shpreh se as ai e as të afërmit e tij nuk kishin kryer ndonjë vjedhje. Sipas akademikut, ata ishin ndaluar në parkingun e një qendre tregtare, pasi ai ndodhej në makinën e djalit të tij dhe nuk kishte autorizim për të ngarë. Barjaba aktualisht ndodhet në SHBA me pushime.

Partia Socialiste ka pezulluar dje nga funksionet si anëtare e Asamblesë Kombëtare, Fatbardha Barjabën, ndërsa nuk pret më kontributin në pozita vullnetare të bashkëshortit të saj, Kosta Barjaba, të emëruar në krye të grupit të punës për çështjet sociale në këtë parti.

Vendimi erdhi një ditë pas raportimit të lajmit se çifti Barjaba dhe vajza e tyre 23 vjeçe u arrestuan në SHBA për vjedhje. Me anë të një deklarate për shtyp, kreu i PS-së për Tiranës, Saimir Tahiri bëri të ditur "nisjen e një procedure të plotë sqaruese nga ana e Komisionit të Garancive Statusore të PS-së për pozitën e anëtares së organizatës nr.1896 në Tiranë, Fatbardha Barjaba, në raport me ngjarjen e bërë publike tanimë. Kjo është një procedurë e kërkuar nga unë si kryetar i PS Tiranës, duke vlerësuar qoftë pamundësinë që Fatbardha Barjaba të kontribuojë në çfarëdo roli për PS në kushtet kur mbi të rëndon një pozitë e papajtueshme me vlerat e familjes sonë politike, por qoftë duke njohur edhe të drejtën e saj për të dhënë në një instancë statusore të partisë, sqarimet e veta. Sigurisht ajo mund ta bëjë këtë nëse e dëshiron një gjë të tillë dhe nëse ka prova që e lehtësojnë pozitën e vet, e cila e përsëris se në këto kushte është e papajtueshme me vlerat e familjes sonë politike", ka sqaruar Tahiri.

Kosta Barjaba lindi në vitin 1960, në rrethin e Sarandës. Ka ndjekur studimet e larta për Shkencat Politike, në Universitetin e Tiranës. Në moshën 29-vjeçare, ai mori titullin Doktor i Shkencave në Sociologji. Pas viteve ’90, Kosta Barjaba i thelloi njohuritë e tij, duke kryer specializime të ndryshme në Greqi, Itali dhe SHBA. Në vitin 1999 ai fitoi titullin Profesor. Në vitin 2005 kryen specializimin Master në Universitetin e Harvardit. Pas gjashtë vitesh, në vitin 2011 zgjidhet anëtar i Akademisë së Shkencave të Shqipërisë.

Barjaba është një pjesëmarrës aktiv në jetën akademike, shkencore dhe publike të vendit. Veprimtaria e tij shkencore përqendrohet ndër të tjera, në çështjet e emigracionit, të varfërisë dhe problematikat e zhvillimit. Rezultat e kërkimeve të tij shkencore referohen si brenda vendit, ashtu edhe në rrethe akademike ndërkombëtare. Aktualisht është dekan i Fakultetit të Shkencave Politike dhe Administratës Publike në një prej universiteteve private në vend. Kosta Barjaba është i martuar dhe ka dy fëmijë. /Telegrafi/
 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.