Me Opera Mini shfletohen 1 miliardë faqe në ditë
Përdoruesit e shfletuesit në mobil - Opera Mini, vizitojnë më shumë se 1 miliardë faqe të internetit, çdo ditë. Nëse dëshironi shifra edhe më të hollësishme, atëherë kjo nënkupton që përafërsisht më shumë 11.500 faqe kompresohen për çdo sekondë nëpërmjet këtij shfletuesi.Këto të dhëna janë publikuar nga vetë kompania Opera, e cila të njëjtat i konsideron si një arritje të madhe, duke e marrë parasysh që iPhone dhe telefonat tjerë të cilët bazohen në Android, e kanë shfletuesin e tyre zyrtar.
Në qershor të vitit 2008, Opera Mini kishte arritur rekord prej 100 milion faqesh të cilat shfletoheshin çdo ditë, ndërsa në qershor të 2010-ës përmes këtij shfletuesi hapeshin më shumë se 910 milion faqe.
Ajo që Opera Mini e bën ndryshe nga konkurrentët e saj, është kompresimi i “proxy serverëve” të cilët transformohen në atë mënyrë që shfletimin e faqeve të internetit në mobil, e bën të lehtë dhe të këndshëm. / Telegrafi
