Në Han të Elezit kapen katër shtetas të huaj
Gjatë orëve të pasdites së djeshme, oficerët doganor të Kosovës kanë ndaluar një grup prej katër shtetasve të huaj, të cilët, përmes një ngarkese komerciale, kanë tentuar të futen ilegalisht në Kosovë.“Gjatë procedurë së zhdoganimit të mallrave nga një kompani kosovare, e cila importonte mallra nga Turqia, oficerët doganor arritën të gjenin të fshehur brenda maunës katër shtetasit e huaj, që të gjithë me origjinë nga vendet aziatike. Pas zbulimit, menjëherë është thirrur Policia e Kosovës, e cila e ka marr rastin përsipër dhe ka bërë arrestimin e katër personave”, thuhet në një komunikatë të Doganës së Kosovës, transmeton KP.
Ky është rasti i dytë i zbulimit të tentimit të hyrjeve ilegale të personave brenda javës, pasi tri ditë më herët ishte parandaluar hyrja e tre personave të tjerë, në një mënyrë identike të transportit.
“Dogana ka intensifikuar kontrollet, pasi që janë rritur dyshimet se bëhet fjalë për një rrjet të organizuar të kontrabandës me njerëz, që tentojnë të shfrytëzojnë Kosovën si vend transit”, përfundon komunikata. /Telegrafi/
