Greqi, gjendet kufoma e shqiptarit të arratisur nga burgu
Kufoma e një 40- vjeçari shqiptar është gjetur nga policia greke, në afërsi të kufirit të Kakavijës. Pas hetimeve, policia konstatoi se kufoma i përket një të dënuari në burgun e Nafplios, i cili ishte arratisur nga spitali i këtij qyteti, ku kishte shkuar për disa ekzaminime mjekësore. Arratisja, sipas policisë ka ndodhur në 20 gusht nga spitali, me ndihmën e dy personave të armatosur. Që atëherë 40- vjeçari ishte në kërkim, por u gjet i vdekur më 28 shkurt dhe vetëm sot, pas identifikimit të trupit, lajmi u publikua nga policia greke. Pas kryerjes së autopsisë, policia sqaron se nuk bëhet fjalë për një krim, por hetimet vazhdojnë, transmeton BW.
Ditën e arratisjes mediat greke raportuan se 40-vjeçari shqiptar i burgosur quhet Τetredi Alkibiadi. Më 20 gusht 2012, ai po transportohej në spital për të ndërruar disa plagë. Me sa duket kjo lëvizje e tij ishte e njohur dhe pikërisht në orën 11:00, dy persona me armë sulmuan katër rojet dhe shoqëruesit gjyqësorë të të burgosurit.
Ata qëlluan në ajër për t’i frikësuar dhe duke përfituar nga kaosi dhe paniku që u krijua, arritën të rrëmbejnë të burgosurin duke e futur në një makinë, tip AUDI me të cilën u larguan. Nuk u sqarua nëse personat që morën të dënuarin ishin bashkëpunëtorë, apo armiq të tij dhe as nëse bëhej fjalë për një plan të kujdesshëm arratisjeje, apo një rrëmbim të të dënuarit. Mësohet se 40- vjeçari vuante dënimin me 20 vjet burg për pjesëmarrje në organizatë kriminale dhe grabitje me armë.
Më 30 nëntor 2012 policia greke arrestoi 4 shqiptarë dhe shpalli në kërkim 4 të tjerë, të cilët së bashku kishin organizuar arratisjen, ndërsa në Janinë gjeti makinën që u përdor prej tyre. /Telegrafi/
