Akil Gjakova fiton medaljen e artë në Estoni

18:37 / 22.06.2013

Akil Gjakova ka arritur ta fitojë medaljen e artë në Kampionatin Evropian për kadetë, që është duke u mbajtur në Talin të Estonisë. Xhudisti nga Kosova në finalen e kategorisë deri në 66 kg, e ka mposhtur xhudistin nga Azerbajxhani, Elnur Ahmadlin.

Për të arritur deri në finale, Gjakova ka zhvilluar katër lufta. Fillimisht ai me short u pozicionua në vazon C në kategorinë deri në 66 kilogramë.

Gjakova në raundin e parë ka mundur turkun Denizhan Caliskan, derisa në raundin e dytë mposhti xhudistin nga Rusia, Laura Gomez.

Edhe në raundin e tretë, Gjakova u tregua më i suksesshëm sesa bjellorusi, Hryhory Klebcha, derisa me të njëjtin ritëm vazhdoi edhe raundin e katërtë. Kësaj radhe viktimë e kosovarit ishte, xhudisti nga Armenia, Albert Mkrtchyan.

Pas kësaj fitore, Gjakova u kualifikua në gjysmëfinale, ku e kaloi me sukses pasi e mundi boshnjakun, Petar Zadro.

Në këtë mënyrë, Gjakova i hapi vetës rrugë për të garuar në finale me xhudistin nga Azerbejxhani, Elnur Ahmadli. të cilën e mundi për t’u stolisur me medaljen e artë në Kampionatin Evropian për kadetë, transmeton Express.

Përveç, Gjakovës në Kampionatin evropian për kadet ka garuar edhe Diellza Bunjaku, e cila shënoi vetëm një fitore.

Bunjaku garoi të premten në ditën e parë të Evropianit, ndërsa në luftën e parë e mposhti estonezen Helge Laponin. Bunjaku në luftën e dytë humbi nga francezja Eloise Combeau.

Diellza Bunjaku është xhudistja e vetme që e përfaqëson Kosovën në Evropianin për kadetë. Ajo u paraqit në kategorinë deri në 48 kilogramë.

Në konkurrencën e meshkujve të premten garoi Blenard Begu, i cili e humbi luftën e parë. Ai pësoi nga gjeorgjiani Zviad Khubuluri, në kategorinë deri 60 kilogramë.

Xhudistët kosovarë në Kampionatin Evropian janë paraqitur me flamur të Federatës Ndërkombëtare të Xhudos. /Telegrafi/ 

Komente

Portali Telegrafi ka kënaqësinë t'u ofrojë forum të lirë për komente dhe diskutim. Fyerjet dhe përdorimi i fjalëve banale, do të pasoj me përjashtim të menjëhershëm nga komentimi.
Ju lutem lexoni rregullat këtu.