“Arrest me burg” për Shukri Xhelilin

Gjykata e Krimeve të rënda ka vendosur masën e “Arrestit me burg” për ish-kryebashkiakun e Dibrës, Shukri Xhelili, i cili i kërkoi një 20-vjeçareje favore seksuale në këmbim të vendit të punës.

Xhelili u arrestua dy netë më parë nën akuzat për korrupsion pasiv, për shpërdorim detyre dhe marrëdhënie seksuale në tentativë duke shpërdoruar detyrën.

Prokurori që ka ngritur akuzë ndaj tij është Klodian Braho, ndërsa Xhelili do të mbrohet nga avokati Ferdinand Doja.

Pala mbrojtëse e Xhelilit, e cilësoi arrestimin të padrejtë, ndërsa theksoi se do t’i këshillonte ta çonte çështje në Gjykatën Kushtetuese.

“Do ta këshilloj Xhelilin t’i drejtohet Gjykatës Kushtetuese për të ankimuar shkarkimin. Do t’i drejtohem Kushtetueses, kur Xhelili të ma kërkojë një gjë të tillë”, u shpreh avokati.

Kryebashkiaku u përfshi në një video-skandal seksual që u publikua në “Ora News”.

Denoncimi u bë nga Anisa A, e cila filmoi Xhelilin teksa ai i firmoste kontratën e punës në këmbim të një takimi në një hotel në Tiranë. /Shekulli/