Bushati: Anëtarësimi i Kosovës në NATO krijon stabilitet

NATO-ja duhet që sa më parë t’i integrojë vendet e Ballkanit Perëndimor, në mënyrë që ta parandalojë ndikimir rus në këtë pjesë të Evropës.

Kështu u vlerësua në Asamblenë e Parlamentare të NATO-s e cila i nisi punimet në sesionin pranverorë në Tiranë, e para e këtij lloji në Shqipëri.

Fjalën e hapjes, ministri i Jashtëm, Ditmir Bushati, në rolin e mikpritësit vuri theksin tek sfidat kryesore të NATO-s, që nga siguria në vendet Lindore, terrorizmi dhe kriza e refugjatëve.

“NATO duhet të forcojë edhe më tej praninë dhe aftësitë mbrojtëse në skajin Lindorë dhe të rrisë praninë edhe në Detin Mesdhe”, tha ministri i Jashtën shqiptar, Ditmir Bushati. Ai e vlerësoi si shumë të rëndësishme anëtarësimin e Malit të Zi në NATO, për ta shmangur në këtë mënyrë ndikimin rus në rajon.

Presidenti i Asamblesë Parlamentare të NATO-s, Michael Turner, po ashtu vuri theksin tek rritja e rrezikut rus në lindje të Evropës.

Ai tha se NATO duhet të denoncojë kërcënimet bërthamore të Rusisë.

“ShBA-të kanë propozuar një kërkesë për katërfishimin e fondeve për praninë e NATO-s në Evropë.
Kongresi ka ndërmarrë edhe masa për këtë gjë. Edhe pse SjBA po bën më shumë, edhe partnerët tanë evropianë duhet të bëjnë më shumë. Ne duhet t’i japim siguri partnerëve tanë, sepse nuk duhet të harrojmë që ekonomia e Rusisë është më e vogël se ajo e Italisë, por kemi të bëjmë me stabilitetin e Evropës”, tha Turner, duke theksuar se Rusia e sheh NATO-n si rivale.

Ai theksoi gjithashtu se Shqipëria ka bërë një punë të lavdërueshme për zgjerimin në NATO.

“Anëtarësimi i vendeve si Serbia e Kosova, do të jetë faktor stabiliteti për rajonin e Ballkanit”, shtoi Turner.

Duke u ndalur te sfidat e sigurisë globale, ai theksoi se ISIS është kërcënim për mbarë botën. Sipas tij, kjo organizatë mbetet kërcënim edhe për Libinë dhe kjo çështje do të jetë në fokus të NATO-s.