0Shares

Protestat kundër faljes së dy pronave shoqërore Manastirit të Deçanit do të vazhdojnë prapë këtë fundjavë.

Kryetari i Këshillit Organizativ të Protestave, Adem Lushaj, ka thënë për Telegrafin se protestat, tash për tash, janë e vetmja mënyrë për të kundërshtuar atë që e quan tendencë për të bllokuar zhvillimin e Komunës së Deçanit, gjatë përpjekjes për të favorizuar Manastirin e Deçanit.

“Ne kemi pritur nga Qeveria dhe Kuvendi që të na mbështesin, por duket se qeveritarëve ju pëlqejnë karriget e buta”, ka thënë Lushaj.

Kohëve të fundit janë zhvilluar disa protesta kundër vendimit të Gjykatës Supreme të Republikës së Kosovës për çështjen e dy pronave shoqërore të Ndërmarrjes Bletare “Apiko” dhe Ndërmarrjes Hoteliere “Iliria”, të cilat pritet t’i jepen Manastirit të Deçanit.

Kundërshtuesit deklarojnë se është absurde që sistemi gjyqësor i Kosovës të vërtetojë një vendim të marrë në vitin 1997 nga ana e administratës së dhunshme serbe.

Protestat janë mbështetur vazhdimisht nga kryetari i Komunës së Deçanit, Rasim Selmanaj, i cili ndër të tjera deklaron se nuk duhet harruar se UNMIK-u i kishte shpallur të pavlefshme ligjet e aplikuara gjatë kohës së Milosevicit, ndërsa ky vendim nuk po vlen për këto dy ndërmarrje. /Telegrafi/

Të Ngjajshme

Portali Telegrafi ka kënaqësinë t'u ofrojë forum të lirë për komente dhe diskutim. Fyerjet dhe përdorimi i fjalëve banale, do të pasoj me përjashtim të menjëhershëm nga komentimi. Ju lutem lexoni rregullat këtu.

Shfaq Komentet (0)