Afati për ofertuesit e PTK-së deri më 14 mars
Sërish shtyhet afati për dorëzim të ofertave, për privatizimin e Postës dhe Telekomit të Kosovës (PTK). Zyrtarë të Ministrisë së Zhvillimit Ekonomik (MZHE), në një konferencë për media, kanë bërë të ditur se afati i fundit për ofertuesit, të cilët konkurrojnë për privatizimin e PTK-së është 14 marsi. Shtyrja e serishme e afatit për ofertuesit e mundshëm, të cilët do të jenë në garë për privatizimin e PTK-së, sipas këshilltarit të transaksionit dhe ministrit të Zhvillimit Ekonomik, Besim Beqajt, është bërë për tu rritur konkurrenca, në mënyrë që të ketë oferta me çmime sa më të larta.
Këshilltari i transaksionit, ka thënë se shtyrja e afatit, nuk do të thotë që procesi nuk është i suksesshëm, pasi që një gjë e tillë ndodh dhe në shumë vende të botës, madje ka vende ku kjo anulohet krejtësisht.
Ndërsa ministri Beqaj ka shprehur besimin, që kjo do të jetë hera e fundit, që do të shtyhet afati. Afati sipas të lartë përmendurve, është shtyre me kërkesë të dy ofertuesve.
Ndryshe në garë për privatizimin e PTK-së, aktualisht janë gjithsej 4 ofertues. /Telegrafi/
