ART: Kodi telefonik +355 pas gjashtë muajsh
Vendimi për zëvendësimin e kodeve telefonike aktuale, që i shfrytëzon Kosova (+377, +381 dhe +386) me kodin telefonik të Republikës së Shqipërisë +355, mund të bëhet pas 6 apo 12 muajsh.
Kryetari i Bordit të Autoritetit Rregullativ të Telekomunikacionit (ART), Ekrem Hoxha tha, se në aspektin teknik një vendim i tillë është i realizueshëm.Ai ka njoftuar se ekzekutimi i procedurave për ndryshimin e kodit telefonik mund të fillojnë vetëm pasi Qeveria të merr një vendim të tillë. “Qeveria merr vendimin për zëvendësimin e kodit telefonik, ndërsa ART bënë ekzekutimin e punëve teknike. Në momentin kur do të merret ky vendim nga Qeveria, atëherë realizimi i bartjes së kodit +355 mund të bëhet brenda 6 apo 12 muaj”, ka thënë Hoxha.
Sipas tij, në realizimin e këtij projekti nuk paraqet problem lidhja e kontratave nga operatorët e telefonisë mobile me Monaco Telecom për shfrytëzimin e kodit +377 dhe Mobitel nga Sllovenia +386.
“Kontrata që ka Vala me Monacon për shfrytëzimin e kodit telefonik dhe IPKO me Slloveninë, mund të shkëputën në momentin kur Kosova e bën kodin shtetëror”, ka thënë Hoxha.
Ndryshe sot Kuvendi i Kosovës miratoi Rezolutën e paraqitur nga, deputeti i Lëvizjes për Bashkim, Agim Kuleta.
Sipas Rezolutës së miratuar Qeveria e Republikës së Kosovës duhet të marrë vendim për zëvendësimin e kodeve telefonike aktuale, që i shfrytëzon Kosova (+377, +381 dhe +386) me kodin telefonik të Republikës së Shqipërisë +355. /ORAinfo/Telegrafi/
