Asgjësohen 64 krerë dhi me brucelozë
Agjencia e Veterinës dhe Ushqimit (AUV) ka bërë asgjësimin e 64 krerë dhi në Zhegër të Gjilanit, të cilat kanë rezultuar pozitiv në sëmundjen e brucelozës. Kjo vjen pas alarmit të Institutit Kombëtar të Shëndetit Publik (IKSGPK) për rastet e njerëzve të infektuar me këtë sëmundje.Lamir Thaçi, zëdhënës në Agjencinë e Veterinës dhe Ushqimit (AUV), ka deklaruar se Drejtoria e Shëndetit dhe Mirëqenies së Kafshëve e AUV-së me të pranuar informatën e Institutit ka filluar hulumtimin diagnostik të fermave të zonës ku ka identifikuar fermën e cila ka të pranishme këtë sëmundje në bazë të marrjes së mostrave të gjakut nga kafshët të cilat janë dërguar për analiza laboratorike.
“Rezultatet e analizave të kryera kanë konfirmuar praninë e shkaktarit të kësaj sëmundje tek tufa e caktuar në fshatin Zhegër, komuna e Gjilanit. Me identifikimin e fermës nga ana e AUV-së janë ndërmarrë masat e nevojshme për parandalimin e përhapjes së sëmundjes tek kafshët dhe njerëzit, në këtë veprim ferma është futur në izolim ku nuk është lejuar konsumimi i produkteve që dalin nga kjo fermë, pastaj është vendosur masa e ndalimit të lëvizjes së kafshëve dhe nuk është lejuar ripopullimi i fermës në fjalë”, ka deklaruar Thaçi, duke shtuar se, si masë më e mirë mbrojtëse për të ruajtur shëndetin e njerëzve dhe kafshëve të zonës është vendosur të bëhet asgjësimi i kësaj tufe për të pamundësuar që sëmundja të prek të tjerët.
Zëdhënësi Thaçi ka njoftuar se asgjësimi është kryer nën mbikëqyrjen e zyrtarëve të AUV-së qendër, nga Zyra regjionale e AUV-së Gjilan si dhe zyrtarët përgjegjës të Kuvendit Komunal të Gjilanit.
“Procesi është kryer me profesionalizëm duke ndërmarrë të gjithë hapat e nevojshëm për rate të tilla. Në fillim janë marrë kafshët nga ferma dhe janë transportuar deri në vendin e caktuar larg vendbanimeve ku është bërë therja, groposja, dhe dezinfektimi i hapësirës përreth vendit ku janë groposur kafshët”, ka deklaruar Thaçi.
Sipas tij, ferma e liruar nga kafshët është dezinfektuar dhe është vënë masa e ndalimit të ripopullimit me kafshë të reja në afat prej 6 muajsh nga data e kryerjes së dezinfektimit.
“Me këtë veprim, Agjencia e Ushqimit dhe Veterinarisë ka bërë parandalimin e përhapjes së sëmundjes në njerëz dhe kafshë, duke i respektuar të gjitha rregullat ligjore për të ruajtur shëndetin e përgjithshëm publik”, është shprehur Thaçi. /Telegrafi/
