Banka TEB lanson shërbimin “pagesë e taksave online’
Pasi që industria bankare në Kosovë po zhvillohet vazhdimisht, edhe Banka TEB po vazhdon të mbajë trendin e një prej aktorëve më të rëndësishëm në zhvillimet e kësaj industrie.Që nga fillimi i operimit të vet në vitin 2008 si bankë e licensuar në Kosovë, TEB-i njihet në treg për produktet inovative dhe të orientuara drejt klientëve si dhe me gamën e gjerë të kanaleve alternative të shitjes që i ofrohen klientëve të vet.
E gjithë kjo ka krijuar një ambient që i mundëson klientëve të gëzojnë një jetë bankare më të lehtë derisa ata përfundojnë transaksionet e tyre bankare.
“Përmes konceptit kreativ dhe inovativ të zhvillimit të produkteve, Banka TEB ka lansuar pagesën e taksave ONLINE për të gjithë klientët e vet biznesor. Pasi që Administrata Tatimore e Kosovës (ATK-së) ka zhvilluar sistemin e vet të deklarimit online, edhe Banka TEB në të njëjtën kohë ka zhvilluar portalin e pagesave në E-banking, duke u bërë kështu banka e parë në Kosovë që ua ofron këtë shërbim klientëve të vet”, thuhet në kumtesë.
Ky shërbim u mundëson njerëzve të kursejnë kohë dhe para duke mos lëvizur nga zyrat e tyre dhe të mos ndalin aktivitetet e tyre biznesore. Mbi të gjitha, ky shërbim do t’u ofrohet falas klientëve për tre muaj ndërsa pas kampanjës, do të jetë edhe më lirë sesa transaksionet në degët e bankës.
E tëra çka klientët duhet të bëjnë është të regjistrojnë kodin e emrit të tyre në ueb-faqen e deklarimit të ATK-së, të kryejnë deklarimin e taksave online dhe format e deklarimit të taksave të tyre automatikisht do të reflektohen në portalin e pagesave të TEB-it ku klientët me një klik kryejnë pagesat. /Telegrafi/
