Bashkë shoqatat e bujqësisë të Ballkanit
Për herë të parë në Kosovë po mbahet konferenca e Rrjetit të Shoqatave të Bujqësisë në Ballkan. Përveç Shqipërisë dhe Maqedonisë, në këtë takim po merr pjesë edhe një shoqatë nga Serbia, përfaqësuesja e së cilës ka hapur mundësitë për bashkëpunim mes shoqatave të Kosovës dhe Serbisë.Për dy ditë radhazi në Prishtinë, përfaqësues të shoqatave bujqësore të vendeve të rajonit, do të diskutojnë për krijimin e mundësive të reja për bashkëpunim mes vendeve rajonale në fushën e bujqësisë.
Ministri i Bujqësisë, Blerand Stavileci, tha se kjo ministri po synon që të përforcojë bashkëpunimin me vendet e rajonit në fushën e bujqësisë. “Vendi ynë edhe përkundër faktit se në procesin e integrimit qëndron pak lë larg krahasuar në vendet e rajonit, ne si Ministri kemi filluar t`i zbatojmë skemat përkrahëse të financuara nga buxheti shtetëror, ku i kemi përfshirë të gjitha kërkesat dhe funksionet kryesore që dalin nga politikat e Bashkimit Evropian për Bujqësi”, tha Stavileci.
Në këtë takim po merr pjesë edhe një shoqatë nga Serbia. Maria Ognjenoviç përfaqësuese e shoqatës “Agromrezha” tha se ky takim do të ndikojë në thellimin e bashkëpunimit mes Kosovës dhe Serbisë.
“Shoqata “Agromrezha” ka bërë përpjekje që ta gjejë një partner nga Kosova të cilat së bashku do të aplikonin për grante në Bashkësinë Evropiane. Mirëpo gjatë përpjekjeve tona për të identifikuar një partner në Kosovë, kemi hasur në disa probleme. Por, unë shpresoj se në të ardhmen nuk do të kemi më probleme të cilat kryesisht kanë qenë probleme administrative”, theksoi ai, transmeton RTK-Radio.
Projekti për mundësitë e bashkëpunimit rajonal do të zbatohet nga Iniciativa për Zhvillimin e Bujqësisë së Kosovës gjatë tri viteve të ardhshme. /Telegrafi/
