Borxhet e rrymës nuk falen
Borxhet e konsumatorëve të cilat i kanë Korporatës Energjetike të Kosovës (KEK) që nga paslufta nuk do të falen kanë bërë të ditur për Telegrafin zyrtarët e Ministrisë së Zhvillimit Ekonomik. Sipas tyre nuk do të ketë falje e as ngrirje të borxheve.Të gjitha ata të cilët i kanë borxhe Korporatës Energjetike të Kosovës (KEK), për rrymën e shpenzuar, e që kanë shpresuar se borxhet e tyre do të falën pas privatizimit të rrjetit të shpërndarjes dhe furnizimit kanë shpresuar kotë, pasi që kjo nuk mund të ndodh sipas MZHE-së.
“Borxhet për rrymën e shfrytëzuar nuk do të falen dhe as që do të ngrihen për një kohë. Ato borxhe gjithsesi duhet të paguhen”, kanë thënë zyrtarët e MZHE-së nëpërmjet zyrës për informim.
Po ashtu ata kanë bërë të ditur se kompania e cila ka privatizuar rrjetin dhe distribucionin do të marr një përqindje të caktuar nga mbledhja e borxheve.
“Siç ka theksuar shumë herë ministri Besim Beqaj, inkasimi i borxheve të vjetra është pjesë e një marrëveshje komerciale në mes të KEK-ut dhe privatizuesit të KEDS-it dhe kompania privatizuese do të merr pjesën e vet për inkasimin e borxheve të vjetra sipas kësaj marrëveshje”, kanë thënë ata në përgjigjet për Telegrafin.
Borxhet e konsumatorëve që nga paslufta ndaj KEK-ut janë mbi 400 milionë euro. /Telegrafi/
