Borxhi i jashtëm i Kosovës 1.4 miliardë euro
Borxhi i jashtëm i Kosovës, i cili përfshinë borxhin privat dhe borxhin publik në fund të vitit 2011 arriti në 1.4 miliardë euro. Në anën tjetër, borxhi ndaj ekonomisë së Kosovës, sipas Odës Ekonomike të Kosovës (OEK), është 2.9 miliardë euro.
Ky pozicion në kuadër të borxhit të jashtëm bënë që Kosova të jetë net kreditor për 1.5 miliardë euro. Pjesa më e madhe e borxhit të jashtëm i takon formës së kredive ndërmjet kompanive në kuadër të investimeve të huaja direkte.
“Rrjedhimisht, kompanitë e huaja që operojnë në Kosovë i detyrohen sektorit të jashtëm me një vlerë prej 565.4 milionë euro apo 39.6 për qind të gjithsej borxhit të jashtëm”, thuhet në buletinin e publikuar nga Oda Ekonomike e Kosovës.
Ndryshe zyrtarët e Ministrisë së Financave (MF), kanë thënë më herët se Kosova ka vetëm 0.6 për qind të GDP-së borxh publik. /Telegrafi/
