Britania del nga recesioni
Të dhënat zyrtare treguan se Britania e Madhe doli nga recesioni në tremujorin e tretë dhe në periudhën korrik-shtator ka siguruar normën më të lartë të rritjes të Prodhimit të Brendshëm Bruto për pesë vitet e fundit. Sipas Zyrës Kombëtare të Statistikës, prodhimi i brendshëm bruto në Britani u rrit me 1 për qind në tremujorin e tretë, rritja më e fortë në 5 vitet e fundit dhe kundrejt rënies me 0.4 për qind në tremujorin e dytë të vitit. Në normë vjetore, ekonomia britanike nuk regjistron rritje.Shifrat kanë entuziazmuar investitorët, shumica e të cilëve parashikonte rritje në normë tremujore me 0.6 për qind dhe në normë vjetore rënie me 0.5 për qind.
Vlerat pozitive të ekonomisë, që pasoi 3 tremujorë në radhë të tkurrjes ekonomike, janë një lajm shumë i mirë dhe për qeverinë e koalicionit e cila është gjendur nën një presion të lartë për të garantuar një normë më të mirë të rritjes së ekonomisë dhe në listën e atyre që bënë presion ka qenë dhe Fondi Monetar Ndërkombëtar.
Megjithatë, një pjesë e analistëve paralajmërojnë se shifrat duhet të shikohet me rezerva për të analizuar efektet e përkohshme pozitive që japin zhvillimi i Lojërave Olimpike si dhe krahasimi me tremujorin e dytë ku ka pasur një numër më të ulët të ditëve të punës për shkak të festave kombëtare. /Telegrafi/
