BSPK: Të enjten protestë masive kundër privatizimit
Këshilli Drejtues i Bashkimi të Sindikatave të Pavarura të Kosovës (BSPK), ka vendosur të martën që më 20 shtator të mbajë proteste masive. Këshilli Drejtues formoi edhe Këshillin organizativ të protestës në përbërje prej 5 anëtarëve.“Marshimi i protestuesve do të fillojë nga Hoteli Grand dhe do të vazhdojë deri tek Hoteli Swiss Diamond në Prishtinë”, njofton BSPK.
“Kjo protestë do të fillojë në ora 12:00 dhe do të zgjasë deri në ora 13:00. Protesta do të jetë dinjitoze dhe e qete. Grumbullimi i protestuesve, të cilët vijnë nga regjionet me automjete transportuese (autobus, vetura etj.) do të bëhet te parkingu prapa Pallatit të Rinisë”.
Kërkesa e BSPK-së në këtë protestë do të jetë që të mbështet nga Kuvendi i Kosovës dhe Qeveria, kërkesa e ngritur nga ta për ndërprerjen e procesit të privatizimit të ndërmarrjeve publike PTK-së, KEK-ut dhe likuidimin Trepçës.
Sindikalistët e Kosovës kanë mbledhur rreth 61 mijë nënshkrime të qytetarëve për të kundërshtuar shitjen e ndërmarrjeve publike. /Telegrafi/
