Debat i ashpër në Kuvend për privatizimin

Zhvillohet debat i ashpër për privatizimin në Kuvendin e Kosovës. Iniciuesi i debatit, kryetari i grupit parlamentar të Vetëvendosjes, Visar Ymeri tha se procesi i privatizimit, i filluar në vitin 2001, ka shkaktuar pasoja të mëdha për ekonominë e Kosovës. Madje pasoja të dëmshme do të sjell edhe vazhdimi i këtij procesi edhe në ndërmarrjet publike nga qeveria e Kosovës. Ai theksoi se shumica e ndërmarrjeve të privatizuara kanë ndërruar destinacionet, janë shndërruar në objekte hoteliere, në depo, apo qendra tregtare, madje edhe sheshe ndërtimi. Sipas tij, më së keqi e kanë pësuar të punësuarit.

Qeveria e Kosovës në vitin 2008 ka vazhduar punën e lënë nga Agjencia Kosovare e Mirëbesimit, në vend që ta ndërpriste dhe të zhvillonte hetime rreth këtij procesi, tha Ymeri. Por ministri i zhvillimit ekonomik, Besim Beqaj, tha se për procesin e privatizimit të drejtuar nga AKM-ja duhet të thirret në debat zyrtarë të AKP-së, si pasardhëse e saj. Ai ritheksoi se qeveria është e përkushtuar për të vazhduar reformën në ekonomi.

Beqaj u zotua se Qeveria do ta vazhdojë privatizimin, pavarësisht pengesave, qoftë të brendshme apo të jashtme. Këtë proces e mbështeti grupi parlamentar i PDK-së. “Të gjitha këto janë detyrë e Qeverisë së Kosovës, sepse këto punë nuk mund t’i bëjë sektori privat, por ne jemi të bindur se filozofia e ekonomisë së tregut e dëshmuar deri me tani në të gjitha ekonomitë e suksesshme botërore kërkon që zhvillimi ekonomik, rritja e vendeve të punës, rritja e mirëqenies së qytetarëve janë punë të cilat realizohen nga sektori privat”, tha kreu i MZHE-së.

Kryetari i grupit, Adem Grabovci tha se privatizimi është zhvilluar me transparencë të plotë dhe në bazë të standardeve ndërkombëtare dhe se nuk mund të ndalet.Teuta Sahatqia nga LDK-ja tha se kjo parti e mbështet në parim privatizimin, por theksoi se duhet të rishikohet privatizimi i disa aseteve publike, që privatizimi i PTK-së të sillet në Kuvend për miratim bashkë me një strategji përkatëse, të rishikohet strategjia energjetike.

Ndërkaq Donika Kadaj Bujupi, nga AAK-ja tha se ky proces duhet të ndërpritet menjëherë dhe të bëhen hetimet përkatëse.

Por kryetari i parlamentit Jakup Krasniqi tha se privatizimi duhet të vazhdojë, por për këtë ai tha se duhet një debat cilësor dhe konsensus i gjerë dhe të krijohet një bord kombëtar që nuk i nënshtrohet sekserëve. Ai theksoi se populli duhet të qeverisë me pasuritë tokësore e nëntokësore.

Ndërkaq Albin Kurti nga Lëvizja Vetëvendosje u ka bërë thirrje deputetëve që të mos zmbrapsen dhe ta shpëtojnë Kosovën nga privatizimi, duke thënë se qëllimi i tyre nuk është që ta bllokojnë këtë proces, por sepse nuk e përkrahin këtë linjë që po e ndjek qeveria. /Telegrafi/