Diaspora fuqia më e madhe investuese në Kosovë
Kontributi i diasporës në zhvillimin ekonomik të vendit është tepër i rëndësishë, u tha në konferencën me temë “Tërheqja e investimeve të Diasporës në Kosovë” e organizuar nga Ministria e Diasporës. Ministri i Diasporës, Ibrahim Makolli tha se objektiv i kësaj ministrie do të jenë identifikimi, inkurajimi dhe përkrahja e investimeve të diasporës.
Kurse ministrja, Mimoza Kusari–Lila, tha se Agjencia për Regjistrimin e Biznesit do të bashkëpunojnë me Ministrinë e Diasporës në hapjen e qendrave për regjistrim të bizneseve në Zvicër, Gjermani, Amerikë dhe Turqi. “Biznesmenët kosovarë të diasporës sot mund të shohin se regjistrimi i biznesve në Kosovë është më i lehtë, më i lirë dhe merr më pak kohë sesa muaj më parë; procedurat e eksportit dhe importit për mallrat në Kosovë janë reduktuar dukshëm, një numër i konsiderueshëm i licencave të ndërtimit është eliminuar ndërkohë që në fushën e zbatimit të kontratës janë bërë përmirësime të dukshme përmes ligjeve të cilat rregullojnë procedurat përmbarimore, noterisë dhe kadastrës”, theksoi ajo.
Ndër të tjera Ministrja Kusari – Lila përmendi edhe nënshkrimin e marrëveshjeve për mbrojtjen dhe promovimin e investimeve, ku deri tani janë nënshkruar disa marrëveshje me vendet ku jetojnë një numër i konsiderueshëm i kosovarëve.
Në vitin 2010 remitancat në Kosovë ishin 511.6 milion euro ndërsa 30% e investimeve të huaja direkte janë nga diaspora. /Telegrafi/
