Draghi: Asnjë vend nuk do të dalë nga Eurozona
Shefi i Bankës Qendrore Europiane (BQE), Mario Draghi, tha në Konferencën Globale të Investimeve në Londër se do të bëjë gjithçka që është e mundur për të ruajtur euron. Ai theksoi se, Italia dhe Spanja kanë bërë përparime të ndjeshme për sa u përket rimëkëmbjes së llogarive publike dhe reformave, duke shtuar se, duhet vazhduar në këtë drejtim.Numri një i Bankës Qendrore Europiane ka thënë se, nuk është e mundur as të imagjinosh mundësinë që një vend të dalë nga Eurozona. Ai deklaroi se, mekanizmat anti – spekulim janë gati për të funksionuar më mirë se në të kaluarën, duke kujtuar edhe nevojën për të dalë nga fragmentimi financiar dhe se, tregu ndërbankar nuk po funksionon në mënyrën më të mirë të tij.
Draghi tha se, gjatë gjashtë muajve të fundit, Eurozona ka treguar përparime të jashtëzakonshme dhe se, Monedha e Përbashkët është e pakthyeshme, pasi të gjithë do ta bëjnë të tillë. “Eurozona është më e fortë se sa mendohet”, tha ai.
Sipas tij, Eurozona ka ecur më mirë se Shtetet e Bashkuara të Amerikës dhe Japonia përsa i përket inflacionit dhe është krenare për nivelin e bashkëveprimit social kundrejt këtyre dy shteteve. Mario Draghi ka nxjerrë në pah progreset e bëra në gjashtë muajt e fundit, ku sipas tij, janë arritur rezultate të shkëlqyera në financat publike dhe reforma në gjashtë muajt e fundit. /Telegrafi/
