Eksportuesit: Taksa shtesë e Maqedonisë- bumerang
Eksportuesit kosovarë të gypave të salduar dhe të ujit vendimin e shtetit maqedonas për rritje tarifash e shohin si një bumerang. Prodhuesve të ujit, të cilëve shteti fqinj u ka vënë masën doganore prej 40 për qind, u ka shkaktuar mjaft dëme, transmeton KTV. Megjithëse vendimi për këtë tarifë të re, i cili erdhi si kundër përgjigje ndaj vendimit për çimenton, është paraparë si afatshkurtër, ka sjellë pasoja te këta prodhues. Fajin për këtë gjendje të krijuar ia hedhin qeverisë, ndërsa e kritikojnë atë se po luan lojëra politike, të cilat po i dëmtojnë më së shumti ata. Zyrtarë të fabrikës së gypave në Ferizaj megjithatë thonë se nuk janë prekur edhe aq nga ky vendim, ngase tashmë kanë kontraktues maqedonas.
Megjithëkëtë nëse taksa doganore vazhdon edhe pas afatit të caktuar, 1 gushtit, nuk është i mirëpritur. Këto kompani ende nuk kanë vlerësuar dëmet, duke thënë se ende nuk mund të dalin me shifrat e humbjeve të shkaktuara.
Ndërsa porositin qeverinë të ulet e të bisedojnë në zgjidhjen e këtij problemi dhe t’i lë anash këto masa reciprociteti. /Telegrafi/
